Organizata Botërore e Shëndetësisë paralajmëroi sot se sulmet ndaj spitaleve, ambulancave dhe objekteve të tjera të kujdesit shëndetësor ukrainas janë rritur ditët e fundit dhe furnizimet jetike mjekësore po mbarojnë.
Sipas Guardian, agjencia e OKB-së të hënën konfirmoi se të paktën nëntë persona kishin vdekur në 16 sulme në objektet e kujdesit shëndetësor që nga fillimi i një pushtimi rus, raporton Reuters, por nuk tha se kush ishte përgjegjës.
“Ne do të vazhdojmë t’i përditësojmë ato numra. Ato janë rritur mjaft shpejt gjatë ditëve të fundit.”-tha oficerja e lartë e urgjencës e OBSH-së për Europën, Catherine Smallwood.
Drejtori rajonal i Evropës, Hans Kluge tha se agjencia po punon për të marrë urgjentisht furnizime mjekësore në Ukrainë. Ndër furnizimet që po mbarojnë janë oksigjeni, insulina furnizimet kirurgjikale dhe rezervat e gjakut. Ai tha se oksigjeni, vaksinat e fëmijëve dhe ekspertiza e shëndetit mendor ishin ndër prioritetet e tyre kryesore, si dhe nevojat e grave.
”Konfliktet e kaluara na kanë treguar se vajzat adoleshente, gratë me aftësi të kufizuara dhe gratë e moshuara janë në situatën më të cenueshme. Ata përballen me një rrezik të shtuar të vuajtjes së sulmeve nga njerëzit jashtë shtëpisë dhe nga grupet e armatosura, si dhe dhunën e partnerit intim dhe abuzimin dhe shfrytëzimin seksual.”-tha Kluge.
