PD akuzon Banon për fshehje dënimi në Angli, kandidati i Lushnjes: Do ju padis

22 Shkurt, 2022

Përplasjet me Partisë Demokratike dhe koalicionit të “Shtëpisë së Lirisë” janë shtuar sërish ditën e sotme, ku çështje është bërë kandidati i koalicionit “Shtëpia e Lirisë” për zgjedhjet e pjesshme lokale të 6 marsit në Lushnje, Elton Bano. Kandidati në fjalë përgënjeshtroi akuzat nga selia blu se ka fshehur të dhënat e dënimit për grabitje në Britaninë e Madhe, ngjarje e ndodhur në vitet 1998-2000. Bano shton se nuk ka qenë i dënuar për asnjë vepër penale gjatë jetës së tij dhe se në Mbretërin e Bashkuar ka qëndruar si emigrant deri në vitin 2010 pasi i përfundonte lejeqëndrimi.

Në deklaratën e tij të publikuar në Facebook, kandidati i “Shtëpisë së Lirisë” për Lushnjen premton se do ta ndjekë çështjen në fjalë në gjyq duke paditur Partinë Demokratike për shpifje dhe prishje imazhi. Ai e konsiseroi Sekretarin e Përgjithshëm të PD Gazment Bardh si gaz me aromë kimikati.

Postimi i Elton Banos:

DEKLARATË
Lushnje, 22 Shkurt 2022.
Unë, Elton Bano kandidat I kualicionit ‘’Shtëpia e Lirisë’’ për bashkinë Lushnje dua fillimisht të falenderoj çdo bashkëqytetar lushnjar, çdo përkrahës, të rinj dhe të reja, burra dhe gra qe I jeni bashkuar fushatës time në mënyrën më profesionale të mundshme.

E ndjej që sot për herë të parë të reagoj për një shpifje dhe baltën që po mundohen të hedhin mbi mua për të disatën herë rradhazi. Lushnja dhe bashkëqytetarët e mi më njohin dhe e dinë se mua nuk më përndjekë asnjë e shkuar e errët, e dinë se misioni politikë që kam ndermarrë në të vertetë është një mision për qytetin ku jam lindur dhe rritur, shkolloj fëmijët dhe bashkëjetoj më prindërit e mi tashmë në pension.

Pergjigja ime nuk i drejtohet as Gazrave të cilët vijnë ende aromë kimikatesh nga ato që sulmuan demokratët në 8 Janar e as personit që më pantallona të shkurtra në 20 Shkurt rrëzoi bustin e Enver Hoxhes. Une i drejtohem të gjithë qytetarëve të ndershëm lushnjar, prindërve dhe femijëve te mi.

• Deklaroj se nuk kam qënë kurrë i dënuar për asnjë vepër penale në asnjë nga shtetet ku kam qëndruar ndryshe nga kandidatët e Bravës.

• Deklaroj se në Angli kam jetuar si cdo emigrant i ketij vëndi dhe kam poseduar leje qëndrimi që më lëjonte të shkoja e të vija deri në vitin 2010.

• Deklaroj se të gjitha portalet gjobvënëse në posedim të krimit, qeverisë apo Bravës do marrin pergjigjen e merituar në 6 Mars e do pergjigjen para ligjit.

Tentativa juaj e pashpresë për të përbaltur emrin tim do të shkërrmoqet ashtu si është shpërbërë kredibiliteti juaj tek qytetaret lushnjarë.

Ju bëj me dije dhe ju këshilloj që mijëra eurot të cilat i shpërdoroni duke krijuar filma mbi jetën time ti përdorni për kauza sociale e bamirësie.

Pavarsisht çdo tentative të bërë deri tani, pavarsisht dëshirës tuaj të dëshperuar për të penguar fushatën tonë model, të pastër, të ndershme duke trokitur derë më derë, dukë u ulur përkrahë qytetarëve të cilët nuk kanë nguruar të na shohin dritë shprese dhe ndryshimi, pavarsisht çdo gjëje të keqe që po planifikoni në dëshpërim e sipër nga humbja e thellë,une nuk mund të lejoj të luhet pisët me emrin tim nga disa të pafe që politikën nuk e shohin si dicka tjetër veçse zhvatje e popullit shqiptarë dhe perfitime personale.

Sulmi politik I sotëm për mua është një sulm personal që padyshim do ndiqet në rrugë ligjore për shpifje dhe prishje imazhi parashikuar nga neni 120/2 i Kodit Penal.

Përgjigjen sot po e jap për personin më të rëndesishëm në jetën time, që sot e kam larg vetes në vendin ku po kurohet që ju po prap nuk hezituat ta përdornit për shpifjet tuaja.

Zemra e babit, sa gjysmën e guximit dhe forcës tënde të kishin këta mjeranë Lushnja dhe Shqipëria nuk do ishin në këto kushte.

Rrofte Demokracia !

Rrofte Shqiperia!

Rroftë Lushnja dhe lushnjarët!

Më herët, PD i dërgoi sot një shkresë Komisionit Qendror të Zgjedhjeve për të kërkuar verifikimin e të dhënave për Elton Banon, pasi pretendon se ai ka fshehur dënimin në Angli për grabitje në vitet 1998-2000 nga formulari i dekriminalizimit. Partia më e madhe opozitare thekson se në rast se një gjë e tillë vërtetohet atëherë, Bano duhet të përjashtohet nga gara për bashkinë e Lushnjes.

Postimi i PD:
PD kërkon verifikim për Elton Bano. Kandidati i LSI-PDK fshehu dënimin për vjedhje në Angli të përjashtohet nga kandidimi.

Partia Demokratike i kërkoi KQZ-së verifikimin sipas ligjit të dekriminalizimit të kandidatit të LSI-PDK në Lushnjë Elton Bano. PD ka të dhëna se ai ka fshehur një dënim për vjedhje në Britaninë e Madhe. “Sipas informacioneve të verifikuara në rrugë konfidenciale nga Partia Demokratike, rezulton se shtetasi Elton Ilir Bano, i datëlindjes 24.07.1978 ka qenë i proceduar dhe i dënuar në Britaninë e Madhe për kryerjen e veprës penale të vjedhjes, në periudhën 1998-2000.”- thuhet në kërkesën e PD drejtuar KQZ-së. PD thekson se këto të dhëna janë fshehur qëllimisht në deklarimin e kandidatit, një fakt që sjell përjashtimin e menjëhershëm të tij.“Fshehja e këtyre të dhënave ka qenë me qëllim për të penguar institucionet të kryejnë verifikimin.”-thuhet në kërkesën e PD për verifikimin e Elton Banos, kandidat i LSI-PDK për Bashkinë e Lushnjës. 3 vitet e fundit, PD ka bërë kërkesa për verifikime të përfaqësuesve te PS në disa Bashki pas zgjedhjeve të Qershorit 2019 dhe të gjitha faktet e bëra publike kanë rezultuar të vërteta.

Çfarë ka ndodhur?
Partia Demokratike dhe Komisioni i Rithemelimit të PD janë përplasur shumë gjatë kohës së përgatitjes për zgjedhjet e pjesshme lokale të 6 marsit. Selia blu publikoi në fillim të këtij një video të kandidatit të “Shtëpisë së Lirisë” për Rrogozhinën Hekuran Xhani, i cili shante me fjalë të rënda ish-kryeministrin Sali Berisha në gjendje të dehur me disa miq.

Vetë ish-lideri i PD ka akuzuar vazhdimisht kandidatin e PD për Durrësin Luan Hotin si person i lidhur me kryeministrin Edi Rama pasi ka përfituar koncesionin e anijeve në Shqipëri.

Më herët, kandidati i Partisë Demokratike për Rrogozhinën Ferdinand Saraçi ka shkruar në formularin e dekriminalizimit se është dënuar në Itali për armëmbajtje pa leje.

PËRGJIGJU Anulo përgjigjjen