-Atmosfera te Partizani nuk është ajo më e mira, për të mos thënë që në këtë pikë të kampionatit është më e vështirë se kurrë. Të kuqtë ende nuk kanë gjetur stabilitetin e duhur dhe kjo reflektohet në rezultate ku skuadra e Ilir Dajës ndodhet në vendin e 7-të në kuotën e 9 pikëve.
Ditën e djeshme skuadra kryeqytetse nuk shkoi më shumë se një barazim 1-1 ndaj Lacit. Kështu, në përfundim të ndeshjes, kur lojtarët janë afruar për të përshëndetur tifozët, kanë nisur thirrjet “ik, ik”, ndërsa janë kontestuar drejtori Olsi Rama dhe tekniku Ilir Daja.
Tifozët kërkuan llogari e kjo shtyu Ramën që të shkonte pranë tyre që t’u përgjigjej. Në atë moment, nuk u shmang tensioni, pasi ndërsa Rama fliste me një grup tifozësh duke kërkuar që të mbështetnin ekipin e të mos e kontestonin, disa të tjerë nuk ngurruan të shprehnin pakënaqësinë ndaj drejtuesit.
“Po pse me tifozët do merresh ti? Ik merru me ekipin”, ishte përgjigja e një prej tifozëve, më pas u desh ndërhyrja e stjuardëve për të ndalur disa tifozë të cilët për pak sa nuk zbritën në fushë që të konfrontoheshin fizikisht me të.
