Athinë, 8 Prill 2025
Një plan i mirëorganizuar për arratisje nga burgu i sigurisë së lartë të Koridhalosit në Greqi është zbuluar nga autoritetet greke. Sipas mediave vendase, grupi përfshinte shtetas me origjinë shqiptare, turke dhe greke, të cilët kishin bashkëpunuar për të realizuar arratisjen duke marrë peng një punonjës të burgut.
Plani u zbulua pas një operacioni të policisë, gjatë të cilit brenda qelive u gjet një armë zjarri e tipit “Glock” dhe një karikator me 15 fishekë.
Në përfundim të aksionit janë arrestuar 20 të burgosur, ndërsa identiteti i tyre nuk është bërë ende publik. Policia ka nisur hetimet për të zbardhur se si u fut arma në institucionin e sigurisë së lartë.
Ky incident ngrit pyetje serioze mbi sigurinë në burgjet greke dhe bashkëpunimin ndërkombëtar të personave të dënuar.
