Ministria e Punëve të Jashtme ka mohuar lajmin e përhapur nga mediat ruse se në Ukrainë po shkojnë mercenarë shqiptarë. Në një reagim zyrtar, MEPJ njofton se ka hedhur poshtë të gjitha pretendimet dhe dyshimet e ngritura nga ministri i Jashtëm rus, Sergei Lavrov, duke kërkuar edhe përgënjeshtrimin e lajmit në Tiranë. Ndërsa ka kërkuar edhe një takim me ambasadorin e Rusisë në Tiranë, Mihail Afanasiev.
“MEJP hedh poshtë kategorikisht pretendimet e publikuara sot në agjencinë e lajmeve ruse TAS dhe dyshimet e ngritura nga Ministri i Jashtëm Rus, Sergei Lavrov, për praninë e “mercenarëve shqiptarë” në Ukrainë. Në shenjë proteste është thërritur Ambasadori i Federatës Ruse të cilit i është kërkuar përgënjeshtrimi i lajmit,”-shkruhet në njoftimin zyrtar.
Ministri i Jashtëm i Rusisë, Sergey Lavrov, sipas mediave ruse, tha se mercenarë nga Shqipëria, Kosova dhe Bosnje Hercegovina po rekrutohen për t’u dërguar në Donbas, krahinën e Ukrainës të ndarë mes qeverisë së Kievit dhe separatistëve të mbështetur nga Moska. Lidhur me deklaratën ish-Kryeministri i Shqipërisë, Pandeli Majko, e cilësoi deklaratën e paprecedentë dhe kërkoi që ambasada të japë shpjegime.
(k.m/dosja.al)
