KINË- Shkollat u mbyllën përkohësisht dhe shumë fluturime u anuluan sot në Kinën jugore, pasi stuhia tropikale Yagi e klasifikuar tani si një super tajfun, po shkon drejt ishullit Hainan. Stuhia tropikale përfshiu Filipinet këtë javë, duke shkaktuar rrëshqitje dheu që vranë të paktën 13 njerëz dhe tani po kalon Detin e Kinës Jugore duke shkuar në perëndim drejt provincës Hainan.
Yagi u forcua në det dhe tani klasifikohet si një super tajfun, me erëra deri në 209 kilometra në orë. Super tajfuni pritet të zbarkojë nesër (të premten) në Hainan ose në provincën fqinje Guangdong.
Ndërkohë, shkollat u mbyllën përkohësisht dhe transporti publik u pezullua përkohësisht sot në mesditë në Haiku, kryeqyteti i provincës Hainan. Yagi gjithashtu mund të anashkalojë Hong Kongun, ku niveli i tretë më i lartë i alarmit do të lëshohet sot nga observatori meteorologjik i qytetit.
Hong Kong Express njoftoi se kishte shtyrë gjashtë fluturime, ndërsa transportuesi i ri Greater Bay Airlines anuloi katër dhe riprogramoi dy. Pas Kinës, Yagi do të drejtohet drejt Vietnamit, ku kërcënon rajonet e pjesës veriore të vendit, pranë gjirit të njohur Halong, i cili është renditur në Listën e Trashëgimisë Botërore të UNESCO-s.
Shërbimi i motit të Vietnamit lëshoi një paralajmërim sot dhe më shumë se 2700 personel ushtarak janë mobilizuar ndërsa Yagi po afrohet.
