– Gratë janë ndaluar të shfaqen në emisione televizive apo filma në Afganistan, sipas rregullave të reja të vendosura nga qeveria talebane.
Sipas BBC, gratë janë ndaluar të shfaqen në drama televizive, filma apo emisione në Afganistan sipas rregullave të reja të vendosura nga qeveria talebane. Gazetaret dhe prezantueset femra janë urdhëruar gjithashtu të mbajnë shami në ekran, megjithëse udhëzimet nuk thonë se çfarë lloj mbulimi duhet të përdorin. Gazetarët thonë se disa nga rregullat janë të paqarta dhe duhet t’i nënshtrohen interpretimit.
Talebanët morën pushtetin në Afganistan në mes të gushtit dhe shumë kanë frikë se po vendosin gradualisht kufizime të ashpra. Grupi militant islamik, i cili mori kontrollin pas largimit të forcave të SHBA-së dhe aleatëve, thuajse menjëherë udhëzoi vajzat dhe gratë e reja që të shkolloheshin duke urdhëruar të qëndronin në shtëpi. Gjatë sundimit të tyre të mëparshëm në vitet 1990, grave u ndalohej arsimimi dhe vendi i punës.
Grupi i fundit i udhëzimeve të talebanëve, të cilat janë lëshuar për kanalet televizive afgane, përmban tetë rregulla të reja. Ato përfshijnë ndalimin e filmave që konsiderohen kundër parimeve të ligjit të Sheriatit dhe vlerave afgane, ndërsa filmimet e burrave që ekspozojnë pjesët intime të trupit janë të ndaluara. Shfaqjet komedi dhe argëtuese që ofendojnë fenë ose mund të konsiderohen fyese për afganët janë gjithashtu të ndaluara. Talebanët kanë këmbëngulur që filmat e huaj që promovojnë vlera të huaja kulturore nuk duhet të transmetohen. Kanalet televizive afgane shfaqin kryesisht drama të huaja me personazhe kryesore femra.
