Siri – Të paktën 16 anëtarë të forcave siriane të sigurisë janë vrarë në përleshjet me mbështetësit e armatosur të regjimit të mëparshëm.
Sipas Sirisë TV, këto përleshje vazhdojnë në rajonin Jableh, në provincën Latakia, bastion i minoritetit alavit nga i cili vjen familja Assad.
Agjencia zyrtare e lajmeve Sana, duke cituar një burim të Ministrisë së Mbrojtjes, raportoi se “mbetjet e grupeve paraushtarake të Asadit” filluan sulme të koordinuara në zona të ndryshme. Përforcimet janë rrugës për në rajonin Jableh, shtoi ai.
Rivendosja dhe ruajtja e sigurisë në të gjithë Sirinë është sfida më e madhe dhe më urgjente për qeverinë e re që mori pushtetin pasi rebelët islamikë rrëzuan Asadin më 8 dhjetor 2024.
“Grupet e armatosura me të cilat po përballen forcat e sigurisë në rajonin e Latakisë i përkasin kriminelit të luftës Suhail Al-Hassan, i cili kreu masakrat më të këqija kundër popullit sirian nga San”, tha zyrtari.
Autoritetet e reja kohët e fundit kanë kryer operacione sigurie në Latakia dhe provincën fqinje të Tartus. Më herët gjatë ditës së sotme, situata është përshkallëzuar në Beit Aana, fshati nga vjen Suhail al-Hassan, kur banorët kanë penguar arrestimin e një personi të dyshuar për kontrabandë armësh, sipas Observatorit Sirian për të Drejtat e Njeriut. Forcat e sigurisë nisën një operacion por u përballën me persona të armatosur.
Më herët, Sana raportoi se “persona të armatosur hapën zjarr ndaj burrave dhe automjeteve të Ministrisë së Mbrojtjes pranë fshatit, duke rezultuar në vrasjen e një personi (red. anëtar i forcave të sigurisë) dhe plagosjen e shumë të tjerëve”.
Sipas Observatorit, forcat e sigurisë hapën zjarr nga helikopterët kundër personave të armatosur në fshatin Beit Aana dhe zonën pyjore përreth, ndërsa ata bombarduan me artileri një fshat fqinj. Udhëheqësit fetarë lokalë alavitë u bënë thirrje banorëve të “protestojnë në mënyrë paqësore” nesër, të premten.
Këtë javë, katër civilë dhe dy anëtarë të forcave të sigurisë u vranë në Lataki gjatë operacioneve të ushtrisë.
