Virginia Giuffre, një nga akuzueset më të njohura të abuzuesit seksual të ndjerë Jeffrey Epstein — e cila gjithashtu kishte akuzuar princin britanik Andrew për abuzim seksual ndaj saj kur ishte adoleshente — ka ndërruar jetë duke kryer vetëvrasje, njoftoi familja e saj.
Giuffre, 41 vjeç, vdiq në shtetin e Australisë Perëndimore, ku kishte jetuar prej disa vitesh, tha familja përmes një deklarate të dërguar me email.
“Virginia ishte një luftëtare e fortë në betejën kundër abuzimit seksual dhe trafikut seksual. Ajo ishte një dritë që ngriti shpirtin e shumë të mbijetuarve,” thuhet në deklaratën e familjes. “Pavarësisht gjithë vështirësive që përjetoi në jetë, ajo shkëlqente jashtëzakonisht. Do të na mungojë pa masë.”
Policia e Australisë Perëndimore tha se mori një raport të premten vonë, me orën lokale, për vdekjen e një gruaje 41-vjeçare, të cilën nuk e identifikuan me emër, në një banesë në Neergabby, një zonë rurale në periferi të Perth-it. Policia tha se u tentua dhënia e ndihmës së parë, por pa sukses, dhe se nuk dyshohet për ndonjë akt kriminal.
Historia e Giuffre
Virginia Giuffre (e lindur si Virginia Louise Roberts në vitin 1983) është një amerikane që u bë e njohur ndërkombëtarisht për akuzat e saj kundër rrjetit të abuzimeve seksuale të ndërtuar nga Jeffrey Epstein dhe Ghislaine Maxwell. Virginia pati një fëmijëri të vështirë në Shtetet e Bashkuara, duke kaluar një pjesë të jetës së saj nëpër familje strehimi dhe sisteme kujdestarie. Ajo ka deklaruar se si adoleshente ishte viktimë e abuzimeve dhe braktisjes.
Rreth moshës 16-vjeçare, në Palm Beach, Florida, ndërsa punonte në një qendër spa, ajo u rekrutua nga Ghislaine Maxëell për të ofruar “masazhe” për Jeffrey Epstein-in. Por shumë shpejt, ajo u përfshi në një skemë të madhe trafikimi seksual, ku u detyrua të kryente marrëdhënie seksuale me Epstein-in dhe miqtë e tij të fuqishëm.
Giuffre ka deklaruar se Epstein dhe Maxëell e dërguan atë në vende të ndryshme, përfshirë Neë York-un, Londrën dhe ishullin privat të Epstein-it në Karaibe (Little St. James), ku ajo u trafikua për burra të pasur dhe të fuqishëm. Ajo akuzoi princin britanik Andrew (duken e Jorkut) për abuzim seksual kur ishte 17 vjeç. Princ Andreë ka mohuar akuzat, por në vitin 2022 ai ra dakord të zgjidhte çështjen me një marrëveshje financiare jashtë gjykatës, pa pranuar fajin.
Pas vdekjes së Epstein-it në burg në vitin 2019 (zyrtarisht i konsideruar vetëvrasje), Giuffre u bë një nga zërat më të fuqishëm për të kërkuar drejtësi për viktimat e trafikimit seksual. Ajo themeloi një organizatë për ndihmën e viktimave të trafikimit seksual dhe abuzimit, të quajtur SOAR (Speak Out, Act, Reclaim). Virginia u zhvendos në Australi me bashkëshortin dhe tre fëmijët e tyre. Ajo vazhdoi të fliste publikisht për të drejtat e viktimave dhe për nevojën e reformave kundër trafikimit njerëzor.
Të premten në moshën 41 vjeçare, Giuffre ndërroi jetë në Australi. Familja e saj njoftoi se ajo kishte kryer vetëvrasje, duke lënë pas një trashëgimi si një prej zërave më të fuqishëm në betejën kundër abuzimit dhe trafikimit seksual.
Administrata e presidentit amerikan Donald Trump kishte premtuar se do të publikonte të gjitha dokumentet që lidhen me akuzat kundër Epstein-it, përfshirë edhe listat e personave të profilit të lartë të lidhur me të. Në shkurt u publikua “faza e parë” e dokumenteve, por pa zbulime tronditëse.
