42-vjeçari Xhuliano Halili, i dënuar me burgim të përjetshëm për vrasjen e dy shqiptarëve babë e bir, ka marrë përsipër autorësinë e vrasjes së 35-vjecarit Alfons Ndoci dhe plagosjen e 46-vjecarit Altin Vokrri ditën e sotme në burgun e Koridhalos në Greqi.
Halilit i është gjetur një thikë kuzhine, me të cilën dyshohet se ka kryer krimin. Policia greke ndërkohë po heton se ku e gjeti thikën 42-vjecari dhe cili ishte motivi i krimit.
I çuditshëm është fakti që në vitin 2018, Halili ka qenë bashkëpunëtor me Ndocin gjatë arratisjes nga mjeti i transportit të të burgosurve në Portin e Pireut dhe të dy janë kapur më pas së bashku nga policia greke. Xhuliano Halili i njohur ndryshe si “Niko”, akuzohet se në nëntor 2011, në Kalamata, ka vrarë shqiptarët Fillim e Oligert Mesaja, me origjinë nga fshati Caj i Kukësit. Vrasja atëherë ishte porositur nga krimineli famëkeq grek Vasilis Varelas për larje hesapesh.
Halili mësohet se pasi kishte qëlluar me cifte në kokë Fillimin, kishte therrur më pas në fyt djalin e mitur të tij. Halili mësohet se është autor edhe i dy vrasjeve të tjera me pagesë, në vitin 2008 dhe 2009, ku viktima të tij ishin dy shtetas grekë.
Altin Vokrri dhe Alfons Ndoci
