Një nga zyrtarët më të lartë të Hamasit, Saleh al-Arouri, është vrarë në një sulm izraelit me dron në Bejrut duke kërcënuar një përshkallëzim të rëndësishëm dhe të rrezikshëm të luftës së Izraelit kundër Hamasit dhe konfliktit të lidhur me grupin militant libanez Hezbollah.
Sulmi me dron goditi zyrën e Hamasit në Musharafieh, një periferi jugore e Bejrutit. Kanali televiziv për grupin e Hezbollahut të Libanit tha se Arouri ishte vrarë të martën në mbrëmje në një shpërthim së bashku me gjashtë persona të tjerë teksa merrte pjesë në një takim. Një zyrtar i Hamasit, Basem Naim, tha se Arouri ishte vrarë në shpërthim bashkë me dy zyrtarë të tjerë.
Arouri bëhet zyrtari më i lartë i Hamasit që është vrarë që nga sulmet e 7 tetorit. Ai ishte një figurë kyçe në grup dhe shihej si i afërt me Yahya Sinwar, udhëheqësin e Hamasit në Gaza. I konsideruar si bashkëbiseduesi kryesor midis Hamasit dhe Hezbollahut, jo më pak me sekretarin e përgjithshëm të Hezbollahut, Sayyed Hassan Nasrallah, ai ishte gjithashtu një figurë e rëndësishme në rrjetin financiar të grupit.
Ushtria izraelite thotë se është në “gatishmëri të lartë për çdo skenar” pas vrasjes së zyrtarit të Hamasit Saleh al-Arouri dhe gjashtë të tjerëve në Liban.
Kryeministri libanez, Najib Mikati, duke i bërë jehonë frikës për dhunë të mëtejshme rajonale, e përshkroi vrasjen si një “krim të ri izraelit që synon të nxisë një fazë të re konflikti, pas sulmeve të përditshme në jug të Libanit”.
Libani lëshoi në një deklaratë më vonë të martën duke thënë se do të paraqesë një ankesë në Këshillin e Sigurimit të OKB-së për “goditjen flagrante” në territorin e tij. Shpërthimi ndodhi gjatë më shumë se dy muajsh shkëmbime të rënda zjarri midis trupave izraelite dhe anëtarëve të Hezbollahut përgjatë kufirit jugor të Libanit që kur Hamasi filloi sulmin e tij të befasishëm në Izraelin jugor më 7 tetor.
