KAVAJË- Përplasja për motive pronësie në Kavajë ka çuar në pranga një 57-vjeçar, pasi kërcënoi me armë zjarri tip automatik nipin e tij. 57-vjeçari, i identifikuar si Ismail Sopi është arrestuar dje nga Policia pas kallëzimit nga nipi i tij se e kishte kërcënuar se do ta vrasë. Gjatë kontrollit të banesës së 57-vjeçarit, shërbimet e Policisë gjetën dhe sekuestruan, në cilësinë e provës materiale, një armë zjarri automatik, dy krehra dhe municion luftarak.
NJOFTIMI I PLOTË:
Kavajë/Finalizohet nga Komisariati i Policisë Kavajë, operacioni policor i koduar “Property”. Vihet në pranga 1 shtetas që kanosi nipin e tij, për motive pronësie. Sekuestrohen një armë zjarri automatik dhe municion luftarak, që u gjetën në banesën e të arrestuarit. Shërbimet e Komisariatit të Policisë Kavajë, pas marrjes së kallëzimit nga shtetasi A. S., 30 vjeç, se xhaxhai i tij e kishte kanosur se do ta vriste, për motive pronësie, menjëherë kanë organizuar punën dhe kanë finalizuar operacionin policor të koduar “Property”, në kuadër të të cilit u bë kapja dhe arrestimi i shtetasit: – I. S., 57 vjeç, banues në Kavajë.
57-vjeçari ka kanosur për jetën nipin e tij, shtetasin A. S., 30 vjeç, për motive pronësie. Gjatë kontrollit të banesës së 57-vjeçarit, shërbimet e Policisë gjetën dhe sekuestruan, në cilësinë e provës materiale, një armë zjarri automatik, dy krehra dhe municion luftarak. Materialet procedurale i kaluan Prokurorisë, për veprime të mëtejshme.
