Ka mbushur 50-vjeç, dhe miqtë i kanë bërë një surprizën mjaft të këndshme Shefit të Repartit Zjarrfikës në Gramsh, Ilir Llapushi.
Ata kanë përgatitur një tortë që ka imituar një makinë zjarrfikëse simbol i punës së tyre të përditshme. Edhe dedikimi është po aq shprehës “Kjo makinë do adrenalinën e 18-vjeçarit dhe eksperiencën e 32-vjeçarit. Komandant edhe 100”!
Prej disa vitesh, Ilir Llapushi drejton me profesionalizëm dhe përkushtim një nga repartet zjarrfikës shembull në Shqipëri.
Ky repart u ka ardhur në ndihmë, jo vetëm banorëve të bashkisë Gramsh, por edhe fshatrave dhe qyteteve në bashkitë fqinjë.
Reparti i zjarrfikëseve në Gramsh shquhet për disa ndërhyrje mjaft të vështira në fikjen e zjarreve, në përmbytje, në aksidente etj. Shquhet për punën sensibilizuese që ka bërë në shkolla dhe komunitet për parandalimin e shpërthimit të zjarreve apo si të veprosh në raste fatkeqësish.
Reparti zjarrfikës në Gramsh spikati edhe në ndihmën pa kursim që dha në operacionin e shpëtimit pas tërmetit tragjik që goditi Durrësin e mbarë Shqipërinë.
Reparti shquhet edhe për shpirtin novator, duke mbajtur në efiçencë zjarrfikëset e madje duke “shpikur” edhe zjarrfikëse siç ishte rasti i mjetit kamion të ushtrisë.
Por mbi të gjitha në këtë repart ekziston fryma e grupit. Dhe të gjitha këto cilësi që përmendëm kanë një ideator, përgjegjësin e këtij reparti Ilir Llapushi.
Dhe surpriza që ata i përgatitën shefit të tyre ishte me vend dhe mjaft simbolike.
Pas kësaj Ilir Llapushi ka falënderuar gjithë shokët dhe miqtë: Ju faleminderit shumë të gjithëve miqtë e mi për kënaqësinë që më dhatë në këtë përvjetor . Ju përqafoj me shumë respekt e dashuri!
Edhe redaksia e websitit tonë i uron z. Ilir jetë të gjatë dhe vite të lumtura bashkë me familjen e tij!
