Një panel gjyqtarësh të apelit të martën la në fuqi dënimin e vitit 2019 të liderit famëkeq të kartelit meksikan të drogës Joaquin “El Chapo” Guzmán, duke hedhur poshtë pohimet e tij se ai ishte trajtuar në mënyrë të padrejtë. CNN shkruan se në vendimin e tyre, të tre gjyqtarët vendosën që gjykatësi i qarkut të SHBA, Brian Cogan, i cili mbikëqyri çështjen federale të Guzman në Bruklin, e kreu gjyqin tre mujor me zell dhe drejtësi, pasi lëshoi një sërë vendimesh paragjyqësore të hartuara me përpikëri.
Guzmán u dënua në vitin 2019 për 10 akuza, duke përfshirë përfshirjen në një sipërmarrje të vazhdueshme kriminale, trafik droge dhe akuza për armë zjarri. Ai u dënua me burgim të përjetshëm plus 30 vjet dhe u urdhërua të paguante 12.6 miliardë dollarë si konfiskim. Apeli i tij kishte argumentuar se dënimi i tij duhet të anulohej, duke thënë se atij iu mohua e drejta për një gjykim të drejtë dhe ndihma efektive e avokatit për shkak të kushteve të rrepta të paraburgimit. Ai gjithashtu kërkoi që të jepet një gjykim i ri bazuar në sjelljen e supozuar të jurisë, mes argumenteve të tjera.
Prokurorët nuk pranuan të komentojnë, ndërkohë që avokati i Guzman, Marc Fernich tregoi se ata ka të ngjarë të apelojnë në Gjykatën e Lartë për shqyrtim të mëtejshëm.
“Ndërsa respektojmë vendimin e Gjykatës, ne jemi të zhgënjyer që akuzat thelbësore për sjellje të rënda të jurisë vazhdojnë të fshihen nën qilim dhe të lihen plotësisht të pashqyrtuara në një rast me përmasa historike – gjithçka, duket, për shkak të famës së pakrahasueshme të të pandehurit. Jam i sigurt se një peticion për shqyrtimin e Gjykatës së Lartë do të pasojë në kohën e duhur”, thuhet në një deklaratë.
