TIRANË- Delina Fico, bashkëshortja e ministrit të Brendshëm, Bledi Çuçi ka reaguar në vend të të shoqit për vrasjen e 7-vjeçares që dje u masakrua nga skafi i komisarit të policisë, Arjan Tase. Fico shkruan në një postim në rrjetet sociale se ngjarje si ajo e djeshmja në Himarë ndodhin kudo, në çdo vend të botës.
“Domethënë ti po thua që në vende të tjera të botës nuk fare aksidente automobilistike, vrasje me armë, humbje jete për shkak të dhunës kundër grave, përdhunime, humbje jete për aryse të gabimeve mjekësore dhe as policë të caktuar që shkelin ligjin? Në fakt ka. Lexo gazeta e raporte për Italinë, Spanjën e këdo vend tjetër të botës. Lufta me krimin dhe shkelësit e ligjit është një luftë që bëhet kudo. nuk kam për të kuptuar kurrë këtë dëshirën për gjykime ekstreme që nisen nga një premisë e pavërtetë sikur vetëm në Shqipëri ndodhin fatkeqësi e krime të caktuara,”-shkruan ajo në rrjetet sociale. Ndërsa i shoqi ende nuk ka reaguar lidhur me ngjarjen në fjalë.
Ndërsa nesër shoqëria civile e mbështetur nga Partia Demokratike dhe ajo e Lirisë kanë paralajmëruar një protestë para Kryeministrisë. Në protestë kërkohet shkarkimi i ministrisë së Turizmit, Mirela Kumbaros, kryepolicit Gledis Nanos dhe atij të ministrisë së Brendshme, Bledi Çuçit.
Ngjarja e rëndë ndodhi më 2 gusht në Plazhin e Potamit në Himarë, ku 7-vjeçarja Jonada Avdia, u godit për vdekje nga gomonia teksa po lahej në det. E mitura u përplas fillimisht nga pjesa ballore e gomones dhe më pas trupi i saj është prerë nga helikat duke ndërruar jetë në vend. Fëmija, me origjinë nga Tropoja jetonte me familjen e saj në Angli, por ishte kthyer në atdhe për pushime. Drejtuesi i gomones është shefi i policimit në komunitet në Elbasan, Arjan Tase u shoqërua në polici, ndërsa drejtuesi i Policisë së Shtetit, Gledis Nano e përjashtoi Arjan Tasen përfundimisht nga policia.
