Gjykata e Vlorës, ka lënë në fuqi masën shtrënguese të arrestit me burg për 13 persona të cilët u paraqitën për vlerësimin e masës së sigurisë këtë të dielë, në kuadër të operacionit “Tempulli”.
Ndërkohë më kërkesë të prokurorisë, është kërkuar masë më të lehtë Ariselda Delibashi dhe Eriselda Zeka, për rrethanat familjare.
Ndërsa për shkak të moshës dhe rrethanave shëndetësore është vlerësuar në masë më të lehtë sigurie “arrest shtëpie” për Shkëlqim Baka, Fatmir Alikaj, Julian Shabani.
Sipas avokatit Edmond Dëma, për shumë të tjerë kanë munguar provat ndërsa shumë fashikuj të përgjimeve lënë vend për interpretim.
Avokati: E vërteta është që ishin 18 masa sigurimi për tu dhënë sot, por jo të gjithë i bëri Gjykata pasi vetë Prokuroria për shkak të gjinisë dhe për hallet familjare që kishin se njëra është me fëmijë 6 muajsh, dhe për ato erdhi vetë Prokuroria me kërkesën për “Arrest në shtëpi”. Ndërsa nga Gjykata veç që pranoi të gjithë kërkesat e tyre, e ndryshoi vetëm për 3 persona të cilët u përzgjodhën jo vetëm për faktin penal por edhe për moshën që kishin. Njëri është 62 vjeç tjetri ishte më i madh se 58 vjeç. U përzgjodhën dhe i lanë edhe ata në arrest shtëpie derisa të qetësohet situata. Duhej bërë edhe për shumë të tjerë të cilët ishte dhe dyshimi i vakët jo të gjithë personat ishin kapur me mjete e me kështu. Thjesht ishin biseda telefonike, të cilat varen nga interpretimi që u bën. Mendojmë që të tilla vepra nuk janë për tu ndjekur me një masë kaq të madhe edhe me arrest, megjithatë Gjykata ashtu e vlerësoi. Ne do të ankohemi për ato,” u shpreh avokat Edmond Dëma.
