Elbasan, 22 Prill 2025 – Drejtoria Vendore e Policisë Elbasan ka kryer një sërë veprimesh hetimore dhe arrestimesh në ditët e fundit, në kuadër të luftës kundër dhunës në familje, shkeljeve në qarkullimin rrugor dhe konflikteve fizike ndërmjet qytetarëve.
Dhunë në familje
Specialistët për Hetimin e Krimeve në Komisariatin e Policisë Elbasan arrestuan në flagrancë shtetasin S. S., 21 vjeç, i cili akuzohet se ka ushtruar dhunë fizike ndaj familjarëve të tij.
Shkelje në qarkullimin rrugor
Specialistët e Qarkullimit Rrugor arrestuan në flagrancë shtetasin B. K., 56 vjeç, pasi u kap duke drejtuar automjetin në gjendje të dehur.
Gjithashtu, ka nisur procedim penal për L. P., 22 vjeç, i cili në aksin rrugor “Elbasan–Cërrik” ka përplasur një këmbësor, S. Rr., 59 vjeç, i cili ndodhet jashtë rrezikut për jetën.
Konflikte fizike për motive të dobëta
Në Librazhd, janë proceduar penalisht shtetasit Q. Gj., 25 vjeç dhe Y. Gj., të cilët kanë goditur me grushte shtetasin L. O., 35 vjeç.
Ndërkohë, në Cërrik, është proceduar shtetasi R. F., 19 vjeç, pasi ka goditur me grushte shtetasin I. H., 57 vjeç.
Të gjitha materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme ligjore.
