Zëvendësministri i Jashtëm i Rusisë, Sergei Ryabkov, ka deklaruar se Irani ka të drejtën legjitime për vetëmbrojtje, duke e cilësuar marrëdhënien mes dy vendeve si një “partneritet strategjik të pathyeshëm”.
Deklarata u raportua nga agjencitë shtetërore ruse, në vijim të tensioneve të rritura pas sulmeve të SHBA-ve ndaj tre objekteve bërthamore iraniane.
I pyetur nëse Irani ka kërkuar ndihmë ushtarake nga Rusia, Ryabkov u përgjigj për Interfax se bashkëpunimi me Teheranin zhvillohet në shumë fusha, por shtoi se do të ishte e papërgjegjshme të jepeshin detaje konkrete për aspektet e këtij bashkëpunimi.
Që pas bombardimeve të SHBA-ve, zyrtarë të lartë rusë kanë reaguar në mbështetje të Iranit, duke i cilësuar sulmet si të pajustifikueshme dhe duke theksuar të drejtën e plotë të vendit për t’u mbrojtur nga agresionet.
