I dyshuari për të shtënat ndaj dy anëtarëve të Gardës Kombëtare në Washington DC të mërkurën kishte punuar me njësi ushtarake të mbështetura nga CIA gjatë luftës së SHBA-ve në Afganistan, ka konfirmuar agjencia.
I dyshuari, i identifikuar si Rahmanullah Lakanwal, 29 vjeç, erdhi në SHBA në shtator 2021 nën programin Operation Allies Welcome, që u dha disa afganëve që kishin punuar për qeverinë amerikane viza hyrjeje në SHBA.
Lidhjet e Lakanwal me Agjencinë Qendrore të Inteligjencës, e cila punonte krah forcave speciale amerikane në Afganistan, u konfirmuan nga drejtori i CIA-s, John Ratcliffe, për mediat të mërkurën në mbrëmje.
The New York Times raportoi se i dyshuari kishte punuar për disa agjenci qeveritare amerikane në Afganistan, përfshirë një njësi të mbështetur nga CIA në provincën jugore Kandahar, bastion i Talibanëve.
“Administrata Biden e justifikoi sjelljen e të dyshuarit në Shtetet e Bashkuara në shtator 2021 për shkak të punës së tij të mëparshme me qeverinë amerikane, përfshirë CIA-n”, tha Ratcliffe për Fox News Digital, duke shtuar se përfshirja e Lakanwal me agjencinë ishte “si pjesëtar i një force partnere në Kandahar, e cila përfundoi menjëherë pas evakuimit kaotik”.
Dy anëtarët e plagosur të gardës janë identifikuar si Sarah Beckstrom, 20 vjeç, dhe Andrew Wolfe, 24 vjeç. Të dy janë pjesë e gardës kombëtare të Virxhinias Perëndimore dhe janë në gjendje kritike.
Ata ishin betuar në shërbim më pak se 24 orë para se të sulmoheshin në një stacion autobusi nga i dyshuari.
Jeanine Pirro, prokurore e SHBA për Washington DC, tha në një konferencë për shtyp të enjten se i dyshuari kishte përdorur një revole a.357 Smith & Wesson, duke qëlluar një anëtar të gardës dy herë përpara se të hapte zjarr ndaj të dytit.
Ajo tha se dy gardistët e plagosur “i vunë jetët e tyre në rrezik për të mbrojtur njerëz që as nuk i njohin”.
Anëtarë të tjerë të gardës kombëtare në vendngjarje e neutralizuan të dyshuarin, tha ajo.
I dyshuari është nën arrest dhe po trajtohet në spital.
Pirro tha se ai kishte udhëtuar me makinë përmes SHBA-ve nga shtëpia e tij në Bellingham, Washington, me një plan për të kryer atë që ajo e quajti një “sulm të guximshëm dhe të synuar”.
Prokurorja tha se Lakanwal do të akuzohej për tre akuza për sulm me qëllim vrasjeje ndërsa ishte i armatosur dhe për posedim arme gjatë kryerjes së një krimi të dhunshëm. Pirro tha se nëse gardistët nuk mbijetojnë, akuzat mund të rriten në vrasje të shkallës së parë.
Drejtori i FBI-së, Kash Patel, tha në konferencë se agjencia po e hetonte ngjarjen si akt terrorizmi. Agjencitë e zbatimit të ligjit kishin ekzekutuar urdhra kontrolli në shtëpinë e të dyshuarit në Washington dhe në San Diego, Kaliforni.
Kryetarja e bashkisë së Washingtonit, Muriel Bowser, e cila ka kritikuar dislokimin e gardës kombëtare nga administrata Trump në distrikt, tha: “Këta të rinj duhet të ishin në shtëpi në Virxhinia Perëndimore me familjet e tyre”.
Patel gjithashtu konfirmoi marrëdhënien e të dyshuarit me forcat amerikane në Afganistan. Hetimi, tha ai, do të përfshijë çdo të njohur të të dyshuarit jashtë vendit dhe në SHBA. Shërbimi i Shtetësisë dhe Imigracionit i SHBA tha pas të shtënave se ka ndaluar përpunimin e aplikimeve për rezidencë nga shtetas afganë.
“Me efekt të menjëhershëm, përpunimi i të gjitha kërkesave për emigrim që lidhen me shtetas afganë ndalet pa afat, deri në rishikimin e mëtejshëm të protokolleve të sigurisë dhe verifikimit”, tha agjencia në rrjetet sociale.
Pas të shtënave, Donald Trump urdhëroi 500 trupa shtesë të gardës kombëtare në Washington. Presidenti e përshkroi ngjarjen si një “akt terrori” dhe e quajti emigracionin “kërcënimin më të madh të sigurisë kombëtare me të cilin përballet kombi ynë”.
