Një çift bashkëshortësh janë vënë në pranga në zonën e Selitës në Tiranë, pasi shisnin kokainë, në ambientet e apartamentit të tyre, në katin e katërt të një pallati. Mësohet se ata kishin ngritur një skemë për shitjen e kokainës në doza të vogla, në të cilën kishin përshirë edhe nipin e tyre të mitur.
Ai shërbente për ti marrë paratë blerësve në katin e parë të pallatit, dhe më pas ata ngjiteshin në katin e katërt për të marrë dozën e kokainës.
Policia më herët nuk kishte mundur të dokumentonte përfshirjen në shitjen e drogës për shkak të skemës që ata përdornin.
Mësohet se banesa e tyre ka qenë e monitoruar nga kamera sigurie, dhe sa herë që kanë pasur kontrolle më herët nga policia, ata e asgjesonin lëndën narkotike në tualet.
Në kuadër të operacionit Tempulli 2, në banesën e çiftit u gjet një sasi e konsiderueshme kokaine, e bërë gati në doza për t’u shpërndarë pasi ndërhyrja u bë nga forcat elitë RENEA, të cilët vunë në pranga të tre, bashkë me nipin. Identitetet e personave të arrestuar nuk bëhen me dije, ndërkohë që në të gjithë vendin janë arrestuar 273 persona, për shpërndarje të lëndëve narkotike.
