Greqia u bë vendi i fundit evropian të enjten që vendosi kufizime të mëtejshme për qytetarët e pavaksinuar mes rasteve në rritje të koronavirusit dhe shtrimeve në spital. Politico shkruan se duke filluar nga e hëna, ata që nuk kanë çertifikatë vaksine do të ndalohen nga ambientet e brendshme si kinematë, teatrot dhe palestrat.
Ata tashmë nuk lejoheshin brenda restoranteve, bareve dhe kafeneve. Njerëzit e pavaksinuar do të jenë ende në gjendje të hyjnë në disa dyqane thelbësore, si farmaci dhe supermarkete, si dhe të ndjekin kishën.
Kryeministri grek Kyriakos Mitsotakis tha në një fjalim televiziv duke njoftuar rregullat e reja se plani i tij ishte që vendi të kishte një Krishtlindje më të mirë këtë vit se vitin e kaluar. Rreth 62% e popullsisë totale të Greqisë është vaksinuar deri më tani.
Mitsotakis njoftoi gjithashtu se ata mbi 60 vjeç që kanë të drejtë për një vaksinë përforcuese duhet të marrin një të tillë brenda muajit të ardhshëm, ose certifikatat e tyre të imunizimit do të bëhen të pavlefshme shtatë muaj pas marrjes së vaksinave të tyre fillestare.
“Kjo është me të vërtetë një pandemi e të pavaksinuarve. Greqia është në zi për humbjet e panevojshme sepse thjesht nuk ka normat e vaksinimit të vendeve të tjera të BE-së,” tha Mitsotakis.
