Kandidati për deputet i PD – Aleanca për Shqipërinë Madhështore flet për sfidat e sistemit të drejtësisë dhe presionin me të cilin përballet SPAK.
Në vijim të intervistës në podcastin e moderuar nga Anisa Bahiti, Blendi Himçi ndau mendimin e tij për një nga çështjet më të debatuara në vend – drejtësinë dhe funksionimin e SPAK.
Sipas Himçit, reforma në drejtësi ishte një hap i domosdoshëm për Shqipërinë, por ai thekson se procesi ka hasur në vështirësi të shumta dhe se funksionimi i sistemit aktual është larg pritshmërive të qytetarëve.
“Sigurisht që reforma në drejtësi ishte e domosdoshme dhe momenti për të ndërhyrë kishte ardhur. A ka problematika? Pa dyshim që po – dhe janë të shumta,” u shpreh Himçi.
Ai vuri në dukje se siguria dhe funksionimi i sistemit të drejtësisë ende kanë mangësi serioze, veçanërisht në aspektin e zbatimit të reformës. Sa i përket SPAK-ut, Himçi theksoi se institucioni përballet me sfida të mëdha, si brenda vetes, ashtu edhe për shkak të ndikimeve nga jashtë.
“SPAK ndodhet nën presion, si nga politika, ashtu edhe për shkak të mungesës së një përvoje të mirëfilltë në praktikë,” tha ai, duke nënkuptuar se institucioni duhet të forcojë pavarësinë dhe profesionalizmin për të fituar besimin e plotë të publikut.
Deklaratat e Himçit janë në një linjë kritike por konstruktive, duke njohur rëndësinë e reformës në drejtësi, por edhe duke kërkuar përmirësime të thella në funksionimin real të saj.
Podcasti i plotë:
