GAZA- Sekretari amerikan i shtetit, Anthony Blinken së fundmi është shprehur se Hamasi mbetet e vetmja pengesë mes popullit të Gazës dhe Izraelit për një armëpushim.
“Ne po presim të shohim nëse, në fakt, ata mund ta marrin “po” si një përgjigje për armëpushimin dhe lirimin e pengjeve,” tha Blinken vonë mbrëmë në Forumin Sedona të Institutit McCain në Arizona.
“Realiteti, tani për tani, është se e vetmja pengesë mes popullit të Gazës dhe armëpushimit është Hamasi”, shtoi ai.
Blinken paralajmëroi gjithashtu se një sulm izraelit në Rafah, qyteti në Rripin jugor të Gazës që është shtëpia e më shumë se një milion palestinezëve të zhvendosur nga lufta, do të shkaktonte dëme përtej asaj që është e pranueshme.
Sipas sekretarit amerikan të shtetit, Izraeli nuk ka paraqitur asnjë plan për të mbrojtur civilët në këtë sulm të mundshëm.
“Në mungesë të një plani të tillë, ne nuk mund të mbështesim një operacion ushtarak në shkallë të gjerë në Rafah, sepse do të shkaktonte dëme përtej asaj që është e pranueshme ”, tha Blinken.
