Kandidati i Lëvizjes Vetëvendosje në qarkun e Tiranës, Boiken Abazi, ka rrëfyer eksperiencën e tij të parë si kandidat në zgjedhjet e 25 prillit.
Në një postim në rrjetet sociale ai tregon se ajo që e ka prekur më shumë në këtë fushatë ka qenë varfëria e madhe e shumë qytetarëve. Ai thotë se edhe pse LVV nuk u kishte premtuar as lekë dhe as vende pune, sërish ata e kishin votuar duke u bazuar në programin e kësaj partie.
Abazi shprehet se do të kthehet dhe do t’i takojë të gjithë ata që e kanë mbështetur, pasi Lëvizja Vetëvendosje është bërë e njohur, e dashur dhe e domosdoshme për Shqipërinë.
Postimi i plotë:
Ajo që më ka prekur më shumë në këtë fushatë është varfëria e madhe e shumë qytetarëve që kemi takuar. Pasi pashë rezultatet e disa qendrave të votimit kuptova që shumë prej tyre edhe na kishin votuar. Nuk i kishim premtuar as pare as vende pune. Ata, megjithatë, kishin lexuar programin e na kishin votuar, duke sfiduar pamundësinë e duke hedhur poshtë idenë se njeriu nuk e ruan dinjitetin në varfëri. Besimin e tyre tek ne nuk do ta nëpërkëmbim. Do kthehemi e do t’i takojmë të gjithë ata që na kanë mbështetur e shumë të tjerë akoma, sepse Lëvizja tashmë është bërë e njohur, e dashur dhe e domosdoshme për gjithë Shqipërinë.
