Atentatet kanë tronditur sërish qytetin e Vlorës. Mbrëmjen e djeshme rreth orës 22:00, në rrugën “Hajko Çakërri” pranë Poliklinikës së qytetit u qëllua për vdekje Gëzim Sinomati, 22 vjeç.
Mësohet se i riu po qëndronte në ballkonin e shtëpisë, ku u godit me snajper nga autor të paidentifikuar. 22-vjeçari nuk mundi t’u mbijetojë plagëve dhe ndërroi jetë në vendngjarje. Sakaq, mësohet se Sinomati kishte ardhur në Vlorë për pushime pasi jetonte në Belgjikë.
Vlorë/Informacion paraprak
Rreth orës 22:00, në lagjen “Hajro Çakërri”, Vlorë, në rrethana ende të paqarta, është qëlluar dyshohet me armë zjarri shtetasi G. S., 22 vjeç, banues në Vlorë, i cili si pasojë ka ndërruar jetë.
Shërbimet e Policisë kanë rrethuar zonën dhe janë ngritur pika kontrolli në hyrje dhe në dalje të qytetit, si dhe përgjatë rrugëve që lidhin njësitë administrative, me qëllim kapjen e autorit/ve, thuhet në njoftimin paraprak të policisë.
Grupi hetimor po vijon punën për sekuestrimin e çdo prove materiale që do ti shërbejë zbardhjes së ngjarjes dhe identifikimit të autorit/ve.
Në ndihmë të Policisë Vendore janë nisur Forcat Speciale Renea, Forcat Kombëtare të Sigurisë dhe Delta Forcë, thuhet në njoftimin paraprak të policisë.
2 vitë më parë i kanë bërë një atentat xhaxhait të tij. Policia deri më tani ka shoqëruar në Komisariat 10 persona të dyshuar për këtë ngjarje të rëndë.
Më vonë gjatë mbrëmjes, u gjet një automjet tip “BMW” i djegur plotësisht në lagjen “24 Maji” në Vlorë, që dyhohet se mund të jetë përdorur nga autorët e krimit.
Vlorë/Infomacion shtesë
Forcat Shqiponja, Operacionale, Delta, e Forcat Kombëtare të Sigurisë janë në ndjekje të autorëve, të ngjarjes ku mbeti i vrarë me armë zjarri shtetasi G. S., 23 vjeç.
Autorët dyshohet se kanë braktisur mjetin tip “BMW”, në lagjen “24 Maji”, duke e djegur dhe janë larguar duke përfituar nga errësira.
Është rrethuar zona në një perimetër të gjerë të sigurisë dhe vijon kontrolli.
Në mbështetje dhe Forcat Renea për kontrollin e zonës ku dyshohet se janë larguar autorët.
Ndërkohë Grupi i Posaçëm hetimor i ngritur për këtë ngjarje po vijon punën nën drejtimin e Prokurorisë për sekuestrimin e çdo prove materiale që do ti shërbejë zbardhjes së rrethanave të ngjarjes dhe identifikimit të autorëve, thuhet në informacionin shtesë të policisë.
