Policia ka arrestuar Besnik Selxhaferin i cili ditën e djeshme plagosi me armë zjarri Agron Delishin në Dibër.
Gjithashtu është shpallur në kërkim shtetasi E.S, 29 vjeç i cili ka tentuar të fshehë provat materiale për ngjarjen e rëndë.
Ndërkohë, i plagosuri Agron Delishi ndodhet në Spitalin e Traumës në Tiranë ku u transportua me helikopter për shkak të gjendjes së rëndë ku ndodhej si pasojë e plagëve të marra.
Njoftimi i Plotë:
Dibër
U konfliktuan dhe plagosi me armë zjarri një 42-vjeçar, vihet në pranga autori i dyshuar i ngjarjes, shpallet në kërkim bashkëpunëtori i tij dhe procedohet në gjendje të lirë një tjetër.
Specialistët për Hetimin e Krimeve në Komisariatin e Policisë Dibër, në vijim të punës për zbardhjen e plotë të ngjarjes së ndodhur ditën e djeshme, në qytetin e Peshkopisë, ku pas një konflikti për motive të dobëta mbeti i plagosur me armë zjarri shtetasi A.L., 42 vjeç, menjëherë bënë identifikimin, kapjen dhe arrestimin e autorit të dyshuar të ngjarjes, shtetasin B. S., 47 vjeç, banues në Peshkopi, si dhe shpallën në kërkim policor shtetasin E. S., 29 vjeç, bashkëpunëtorë në këtë ngjarje, pasi dyshohet se ka fshehur provat materiale në vendin e ngjarjes.
Gjithashtu u referuan materialet në Prokurori dhe filloi procedimi penal për shtetasin F. L., 31 vjeç, pasi gjatë konfliktit ka goditur me grushta shtetasin N. S., 62 vjeç.
Materialet iu referuan Prokurorisë pranë Gjykatës së Shkallës së Parë Dibër, për veprime të mëtejshme.
