Fansat kanë reaguar me ankth ndaj lajmit se grupi muzikor Coldplay do të ndalojë së regjistruari muzikë në vitin 2025, ndërkohë që një pjesë e kritikuesve u shprehën të lumtur për lajmin.
Sipas The Guardian, lideri i grupit, Chris Martin, ndau lajmin e madh me prezantuesin e BBC Radio 2, Jo ëhiley. Njoftimi vjen dy muaj pasi Coldplay publikoi albumin e tyre të nëntë në studio, Music of the Spheres, i cili shkoi direkt në numrin 1 në fillim të këtij viti.
“Rekordi ynë i fundit i duhur do të dalë në vitin 2025, dhe pas kësaj mendoj se do të bëjmë vetëm turne. Dhe ndoshta do të bëjmë disa gjëra bashkëpunuese, por katalogu i Coldplay, si të thuash, përfundon atëherë”, tha Martin.
Lajmi është në përputhje me deklaratat që Martin ka bërë më parë. Ai tha në tetor se synonin të bënin edhe tre albume të tjera për ta sjellë totalin në 12 por kjo është hera e parë që ai ka vendosur një datë të fundit. Ndjekësit e shumtë të grupit reaguan me trishtim ndaj lajmit por pati dhe nga ata që u shprehën se kishte ardhur koha dhe se në mes gjithë kësaj pandemie më në fund po marrin një lajm të mirë.
Në tetor, Coldplay njoftoi një turne botëror me një sërë iniciativash të dizajnuara për të zbutur ndikimin mjedisor. Grupi ka premtuar të ulë emetimet e CO2 me 50% në krahasim me turneun e tyre botëror 2016-17 dhe pothuajse tërësisht të përdorin energji të rinovueshme për të fuqizuar shfaqjen në skenë. Turneu, i cili do të fillojë në gusht të vitit të ardhshëm, do të përfshijë një “dysheme kinetike” për të shfrytëzuar energjinë e krijuar nga fansat, një skenë të bërë nga materiale të rinovueshme, panele diellore, ndërsa bateria dhe energjia elektrike do të merren nga burime të rinovueshme.
Në fillim të këtij muaji Coldplay u tërhoq nga disa shfaqje, përfshirë shfaqjen e tyre të planifikuar në Capital Jingle Bell Ball në Londër për shkak të testeve pozitive të Covid në festën e tyre në turne. Coldplay janë nominuar për grupin e vitit dhe aktin më të mirë rock/alternativ në 2022 Brit Aëards, të cilat zhvillohen në shkurt.
