Një 34 vjeçar është asfiksuar në ujërat termale të llixhave në Elbasan dhe për pasojë ka humbur jetën. Burime bëjnë të ditur se Alban Pashollari iu dha ndihma e parë në spital por nuk mundi të mbijetonte.
Mësohet se ai ka qenë në shoqërinë e një miku të tij. Ata kanë udhëtuar nga Yzberishi i Tiranës drejt Elbasanit dhe kur janë afruar pranë Llixhave kanë hyrë për tu larë edhe pse vaskat ishin të mbyllura. Raportohet se dy të rinjtë i kanë hapur vetë rubinetat e vaskave për t’i mbushur ato me uji termal.
Fillimisht i riu nga Tirana ka humbur ndjenjat dhe është dërguar në spital, por nuk ka mundur të mbijetojë.
Elbasan/Informacion paraprak
Në fshatin Llixhë, Elbasan, pranë një rezervuari të mbushur me ujë termal, është gjetur në gjendje të rëndë shëndetësore, pa shenja dhune, shtetasi A. P., 34 vjeç, banues në Tiranë, i cili ka humbur jetën gjatë transportimit me autoambulancë, për në spital.
Paraprakisht dyshohet se ky shtetas ka humbur jetën për shkak të arrestit kardiak.
Grupi hetimor po punon për dokumentimin e plotë të rrethanave të ngjarjes.
