TIRANË- Ish-kreu i komunës Shëngjin, Salvador Kaçaj ka dyshime se tentativa për atentat ndaj tij më 14 Maj është organizuar nga kundërshtarët e tij politikë. I ftuar në emisionin “Opinion” në Tv Klan, Kaçaj, pretendon se autorët me maska që e kanë kërcënuar me armë ditën e zgjedhjeve, janë frymëzuar nga kryeministri i vendit, Edi Rama. Po ashtu ai ka theksuar se për 3 javë me radhë, Rama e ka sulmuar gjatë fushatës elektorale në Lezhë.
Pjesë nga intervista:
Klodiana Lala: PD ka denoncuar çdo incident gjatë zgjedhjeve. Si ka mundësi që ju keni heshtur dhe nuk dolët në një deklarim për të denoncuar këtë atentat të pretenduar ndaj jush dhe a keni denoncuar emra konkretë në prokurori?
Salvador Kaçaj: Kam dhënë konferencë për shtyp në darkë në 14 Maj dhe e kam denoncuar. Djali ka bërë denoncimin dhe në ambasadën amerikane se është shtetas amerikan. Ata ishin me maska, nuk kam si të jap emra.
Blendi Fevziu: Po a ke indicie të tuat? Nuk ka rëndësi emri.
Salvador Kaçaj: Ka qenë dita e zgjedhjeve. Këta njerëz i ka organizuar kryetari i partisë, kryetari i bashkisë, kandidati, këta janë organizatorët e këtij krimi.
Blendi Fevziu: Po pse duhet të ju kërcënonin?
Salvador Kaçaj: Nuk e di a jeni të informuar, 3 javë rresht, kryeministri është marrë vetëm me mua në të gjithë qarkun e Lezhës, në Laç, Milot e në çdo vend ku ka shkuar është marrë vetëm me emrin tim është marrë vetëm me mua, kryeministri i Shqipërisë. Përveç se organizon dhe i përgënjeshtron, pastaj kur kryeministri del një ditë mbrapa dhe flet në atë mënyrë, cila polici do të ketë kurajo për ta hetuar? 3 javë fushatë, kryeministri është marrë vetëm me mua, vetëm me emrin tim, më ka sharë, kërcënuar dhe intimiduar.
Klodiana Lala: Pra, po akuzoni vetëm kryeministrin?
Salvador Kaçaj: Natyrisht, ai është inspiruesi. Ai i ka inspiruar dhe ju ka dhënë zemër për të bërë atë veprim sepse për ta bërë atë veprim duhet goxha guxim dhe mbështetje.
