Ish-kryeparlamentari Kadri Veseli është nisur me një aeroplan privat rreth orës 14 nga Aeroporti i Prishtinës për në Rotterdam pas përfundimit të lejes nga Gjykata Speciale e Hagës.
Lëvizjet në selinë e EULEX-it nisën që në orët e para të mëngjesit. Pas fjetjes, Kadri Veseli kaloi edhe mëngjesin e së martës brenda ambienteve të misionit të BE-së për sundimin e ligjit. Megjithatë shtimi i pjesëtarëve të Zyrës së Prokurorisë Specialegjatë ditës, bënë të kuptohej largimi i ish-kreut të Partisë Demokratike të Kosovës dhe Kuvendit të Kosovës.
Rreth orës 12 kur u bllokua rruga nga Policia e Kosovës, me forca të shtuara të sigurisë e me 5 makina të EULEX-it, Kadri Veseli po transferohej në Aeroportin e Prishtinës. Këtu po e priste një aeroplan privat, i cili e solli atë vetëm një ditë më parë në Kosovë. Pas disa përgatitjeve, rreth orës 14:00 aeroplani privat u nis nga Prishtina për në aeroportin e Rotterdamit në Hagë.
I shoqëruar gjatë gjithë kohës nga zyrtarë të ZPS-së, Kadri Veseli u kthye sërish në Qendrën e Paraburgimit në Hagë të Holandës, ku po mbahet që nga 5 nëntori i vitit 2020. Pavarësisht kësaj leje speciale atij i është refuzuar vazhdimisht kërkesa për lirim me kusht dhe ende s’ka datë zyrtare për fillimin e gjykimit ndaj tij.
Ardhja e Veselit në Kosovë u përcoll me masa të rrepta sigurie. Dhomat e Specializuara të Hagës ia kanë lejuar Veselit vizitën në Kosovë pasi të premten e javës së kaluar nëna e ish-kryetarit të Partisë Demokratike të Kosovës, Kadri Veseli, Ajshe Veseli humbi jetën në moshën 93-vjeçare. Muaj më parë, Veselit iu dha një leje e njëjtë për të ardhur në Kosovë nga paraburgimi i Gjykatës Speciale në Hagë, për shkak të vdekjes së babait. Kadri Veseli është duke u mbajtur në paraburgim në Gjykatën Speciale në Hagë, nën dyshimin për krime lufte dhe krime kundër njerëzimit. Ai në korrik të vitit të kaluar humbi edhe të atin Fazli Veseli.
