Kryetari i Partisë Demokratike Lulzim Basha përmes një reagimi është shprehur se “makinacionet e Ramës për t’i pamundësuar opozitës komisionet hetimore tregojnë frikën e tij nga e vërteta”.
Basha u shpreh se “ai që nuk ka asgjë për të fshehur nuk i trembet transparencës”, duke akuzuar kreun e qeverisë.
Ai theksoi se “kohës së pandëshkueshmërisë po i vjen fundi dhe se kartonat e Edi Ramës nuk e ndalin dot”.
Reagimi i plotë:
Ai që nuk ka asgjë për të fshehur nuk i trembet transparencës.
Makinacionet e Edi Ramës për ti pamundësuar opozitës transparencën e aferave korruptive përmes komisioneve hetimore tregojnë frikën e tij nga e vërteta. Por transparenca për aferat korruptive ku është zhytur sot qeveria, që po varfëron dhe detyron shqiptarët të largohen do të bëhet me patjetër.
Sot gjysma e qeverisë është në dyert e drejtësisë e prapa hekurave, dhe të gjithë ata që kanë abuzuar, së shpejti do të japin llogari për aferat e tyre korruptive.
Kohës së pandëshkueshmërisë po i vjen fundi, kartonat e Edi Ramës nuk e ndalin dot.
Presidenti Bajram Begaj vendosi sot dekretimin e ligjit për komisionet hetimore. E gjithë opozita i kërkoi Presidentit të Republikës mos dekretimin e ndryshimeve në ligjin për komisionet hetimore. Një mos dekretim mund të shërbente për zhbllokimin e kaosit parlamentar nga ku opozita si kërkesë parësore ka pikërisht ngritjen e 8 komisioneve hetimore të refuzuara nga shumica socialiste.
Por mesditën e të enjtes kreu shtetit Bajram Begaj dekretoi ligjin për “Funksionimin e komisioneve hetimore të Kuvendit” duke mos marrë në konsideratë kërkesën e opozitës. Këtë dekretim presidenti e shoqëroi me një argumentim të gjatë sa teknik por edhe politik duke theksuar se nuk ka gjetur shkelje të Kushtetutës. Kthimi i ligjeve për shqyrtim thotë presidenti nuk është instrumenti kushtetues që i është dhënë Presidentit të Republikës për të lehtësuar dialogun.
