Kryeministri i Kosovës, Albin Kurti, ka mirëpritur letrën e Sekretarit amerikan të Shtetit, Antony Blinken, duke thënë se mezi pret të punojnë së bashku. Kurti përmes një postimi në Twitter, ka thënë se Kosova i është mirënjohëse SHBA-së në përkushtimin e saj për marrëdhëniet Kosovë-Serbi.
“Unë e mirëpres letrën e Sekretarit Blinken dhe mbështetjen e tij për prioritetet tona në punësim dhe drejtësi. Kosova i është mirënjohëse ndaj SHBA-së në përkushtimin për normalizimin e marrëdhënieve ndërmjet Kosovës dhe Serbisë përmes një marrëveshjeje ligjërisht të detyrueshme me qëllim final njohjen reciproke. Mezi pres të punojmë së bashku”, ka shkruar Kurti.