LSI Durrës dhe vetë Elona Guri ka reaguar sërish në rrjete sociale dhe për mediat, duke thënë se zyra e LSI në Durrës ka qenë gjatë gjithë kohës në vëzhgim dhe në përgjim.
Këtë gjë zyrtarët e LSI e kuptuan pasi Arbër Koka, djali i ish-ministrit Lefter Koka merrte në telefon dhe kërcënonte qytetarët e thjeshtë që shkonin në zyrën e LSI.
Partia thotë në “Facebook” se “u zbuluan kamerat dhe serverat me regjistrime. U njoftuan autoritetet dhe prezente fizikisht në Komisariatin e Policisë në Durrës, drejtuesja politike e LSI Durrës dhe kandidatja e LSI për Durrësin, znj. Elona Guri denoncoi Arbër Koka, djalin e Lefter Kokës si autor të këtij skandali dhe pronarin e ambientit ku ishte strehuar serveri dhe kabujt e kamerave të përgjimit”.
Elona Guri për mediat tha se një kamer-përgjues ishte vendosur në një banesë ndërsa tjetra ishte vendosur në një farmaci, pranë zyrës së LSI-së. Ajo tha se njërën prej tyre e çmontoi vetë.
Guri: Sot kemi konsatuar disa kamera dhe përgjues që janë vendosur tek zyrat e LSI Durrës. Jam shumë e lumtur që zbuluam të gjithë mafien që nuk e mundin dot fitoren dhe uraganin e 25 prillit. Jam e lumtur që ata kanë rënë në batak.
Pyetje: Keni pas përplasje sot?
Guri: Ne thjesht kemi bërë denoncim, i bëj thirrje prokurorisë, policisë dhe ambasadës që të investigojnë se nga kush vjen ky shantazh.
Pyetje: Keni autor?
Guri: Kam bërë kallëzim se ku janë vendosur kamerat, i bëj thirrje edhe ambasadës që të hetojë ngjarjen.
Pyetje: Kush është personi që keni kallëzuar?
Guri: Nuk e bëj publike, derisa policia të dalë me një njoftim. Ju bej thirrje që kjo ngjarje të zbardhet një orë e më parë.
Pyetje: Ku ishin vendosur kamerat?
Guri: Ishin vendosur në një klinikë dhe në një apartament.
Pyetje: A kanë lidhje këto godina me ju?
Guri: Kanë lidhje se janë pranë zyrës së LSI, njëra në të majtë dhe tjetra në të djathtë. Njërën e kam çmontuar unë dhe tjetrën e çmontoi i zoti se e pa që po bënim denoncim. Kam bërë kallëzim dhe për personin që ka shantazhuar gjithë njerëzit tanë. Nëse ngjarja nuk zbardhet, do dal me emra në mes të qytetit.