FRANCË- Franca po bën thirrje për një armëpushim të fortë, të menjëhershëm dhe të qëndrueshëm humanitar në Rripin e Gazës, i cili përfundimisht duhet të çojë në një armëpushim të përhershëm. Zëdhënësi i qeverisë franceze, Olivier Veran, duke sqaruar pozicionin e qeverisë franceze në këtë çështje, i dha të drejtë Izraelit që të mbrohet ndërsa aktualisht janë më shumë se 200 pengje në duart e grupit të Hamasit, por duhet gjetur një zgjidhje mes dy shteteve.
“Franca ruan pozicionin që ka pasur për shumë vite dhe që nuk ka ndryshuar kurrë: ajo ka nevojë për një zgjidhje politike me dy shtete. Palestinezët duhet të jenë në gjendje të jetojnë në një vend nga i cili mund të largohen dhe ku mund të punojnë, ndërsa izraelitët duhet të kenë të drejtën të jetojnë në paqe pa frikën e marrjes së raketave nga Hamasi çdo mëngjes”, theksoi ai.
Ndërkohë, një raport i gazetës franceze Le Figaro flet për një notë të përbashkët në të cilën disa ambasadorë francezë në Lindjen e Mesme shprehnin keqardhjen e tyre për qëndrimin e Parisit në lidhje me konfliktin izraelito-palestinez, duke theksuar se kjo është një lëvizje e paprecedentë në historinë e diplomacisë franceze në botën arabe.
Në veçanti, disa ambasadorë francezë në Lindjen e Mesme dhe disa vende të Magrebit, rreth dhjetë, sipas informacioneve nga gazeta hartuan dhe nënshkruan kolektivisht një shënim në të cilin shprehin keqardhjen e tyre për kthesën pro-izraelite të Presidentit Macron në luftën midis hebrenjve dhe Hamasit. Autorët e shënimit thuhet se shprehin keqardhje për faktin se në disa vende të Lindjes së Mesme dhe Afrikës Veriore, kritikat më të ashpra janë drejtuar jo vetëm kundër Shteteve të Bashkuara dhe Britanisë së Madhe, por edhe kundër Francës, siç tregojnë demonstratat jashtë ambasadave të tyre. Një deklaratë të tillë e bëri edhe presidenti Macron disa ditë më parë. Presidenca izraelite bëri me dije se gjatë një komunikimi që presidenti pati me homologun francez i bëri me dije se qëndrimi për një armëpushim të menjëhershëm në Gazë kishte shkaktuar mërzi në Izrael.
