Një aksident i rëndë ka ndodhur pasditen e sotme në dalje të qytetit të Peshkopisë.
Mësohet se një efektiv policie, i cili ishte në shërbim ka mbetur i plagosur, pasi një makinë ka hyrë brenda një biznesi privat berberhane. Mjeti drejtohej nga Alban Shoti, i cili raporothet se ka humbur kontrollin dhe për pasojë ka shkatuar përplasjen.
I plagosur ka mbetur efektivi Veli Gjura, i cili ndodhet në gjendje shumë të rëndë dhe një ndihmës berber që punonte. Mësohet që polici ishte në shërbim për mbarëvajtjen e qarkullimit, pasi në orën 19:00 kryetari i opozitës shqiptare Sali Berisha kishte mitingun përmbyllës në Peshkopi.
Njoftimi i policisë:
Sot, rreth orës 18:30, në kryqëzimin Velia, në Peshkopi, shtetasi A.Sh., 27 vjeç, duke drejtuar një automjet tip “Golf”, dyshohet se ka humbur kontrollin mbi drejtimin e mjetit dhe mjeti ka dalë nga rruga duke u përplasur me një dyqan. Si pasojë e aksidentit, është dëmtuar shtetasi V.Gj., (punonjës policie në shërbim) i cili ndodhet në spital nën kujdesin e mjekëve.
Nga verifikimet paraprake ka rezultuar se drejtuesi i automjetit ishte nën efektin e alkoolit dhe është shoqëruar në komisariat për veprime të mëtejshme procedurale. Grupi hetimor ndodhet në vendngjarje dhe po punon për të zbardhur rrethanat e aksidentit.
