“Corriere della Sera” analizon ndeshjen e parë gjysmëfinale të Kupës së Italisë mes Milanit dhe Interit, e cila përfundoi 0-0. “Një derbi plot gabime, teknikisht i dobët, – lexojmë në prestigjiozen italiane. – Milani dhe Interi nuk dinë më të fitojnë.
Kthimi do të luhet pas 15 ditësh, kur kushtet e të dyja skuadrave do të jenë të ndryshme dhe shpresojmë më të mira. Sidoqoftë, asnjëra prej milanezeve nuk gjen shtytjen për t’ia filluar përsëri dhe për të lënë pas problemet e ankthet e një momenti të ndërlikuar. Një kambanë alarmi për titullin. Milanit i mungon cilësia në sulm. Interi, nga ana tjetër, duket i trishtuar”.
Gigi Garanzini, në “La Stampa”, shkroi një koment për Milan-Inter: “Derbi i keq, do të flasim sërish pas 15 ditësh dhe është më mirë kështu. Kjo gjysmëfinale e parë ofroi shumë pak nga kuqezinjtë dhe praktikisht asgjë nga zikaltrit. Skuadra e Piolit ka humbur shkëlqimin, por ajo e Inzaghit është vërtet në hall.
Agjërimi sulmues vazhdon, faza e sulmit është bërë vërtet opsionale. Një sfidë e trishtë, e cila, lexo për kampionatin, rinis edhe një herë ambiciet e Napolit dhe ëndrrat e Juventusit për rikthim, pa harruar Atalantën”.
Në “Gazzetta dello Sport” ka një artikull të Luigi Garlando për derbin e mbrëmshëm mes Milanit dhe Interit: “Le të themi se të dyja skuadrave iu pëlqeu të sulmonin dhe shënonin në fillim. Sidoqoftë, më pas u tkurrën nga frika dhe e ulën ritmin. Një 0-0 me ‘frena dore’, një nga derbet më pak emocionues dhe më pak cilësor që Milano mban mend.
Në përgjithësi, Milani është pak më mirë, por përsëriti vështirësinë për të furnizuar me topa Giroud. Inzaghi duhet të jetë më i shqetësuar për ngërçin atletik që dëshmoi Interi i tij. Nuk funksionon më si dikur.
Zikaltrit kërkojnë Dzeko me topa të gjatë, sepse ai nuk është më në gjendje të driblojë. Barella është simboli i involucionit: më parë ishte lëvizje e përhershme, sot duket sikur vrapon në dëborë. Dhe më pas goli; ndeshja e katërt radhazi pa e gjetur rrugën e rrjetës, 403 minuta agjërim”.
