Prokuroria e Shkodrës ka rrëzuar alibinë se 39-vjeçarja Alma Arrazi u hodh së bashku me tre fëmijët e saj nga ura e vjetër apo ura e re në lumin Bunë mbrëmjen e tragjedisë, më 2 Maj.
Një kukull e gjetur nga policia poshtë urës së re të Bunës, e cila dyshohet se është e një prej vajzave të mbytura të Alma Arrazit, zbuloi edhe vendin ku 39 vjeçarja mund të ketë kryer aktin e rëndë.
Kukulla, e cila u gjet në këmbët e urës në një vend me zhavor dhe pemë e shkurre, është sekuestruar nga prokuroria dhe do t’i bëhet AND-ja për të zbuluar nëse i përket viktimave.
