MALI I ZI- Një 25-vjeçar shqiptar është arrestuar në Malin e Zi. Srpskainfo shkruan se i riu shqiptar dyshohet si pjesë e një grupi të strukturuar kriminal. Ai është arrestuar në pikën kufitare të Sukobinit dhe dyshohet se do të kryente vrasjen e një anëtari të klaneve të Kotorrit.
Ende nuk është bërë i ditur identiteti i tij, por në pranga ka rënë edhe bashkëpunëtori i tij nga Armenia. Po ashtu është shpallur në kërkim dhe një tjetër bashkëpunëtor i tyre nga Armenia. Policia e Budvës mbrëmjen e djeshme ka vërejtur një automjet “VW Polo” me targa të Barit në rrugën “Slovenska plaža”, të cilin e ka ndaluar për kontroll.
Pas ndalimit të mjetit, tre persona kanë dalë me shpejtësi dhe kanë tentuar që të largohen, por vetëm njëri prej tyre ka mundur të shpëtojë. Në automjet u gjetën dy pistoleta ‘Glock’ me 19 fishekë secila, një pistoletë automatike ‘Scorpion’ me silenciator dhe 17 fishekë, dy maska silikoni si dhe disa palë doreza dhe rroba për ndërrim. Hetimet janë në vijim e sipër, për të zbardhur rrethanat nën të cilat ishte planifikuar kryerja e kësaj vrasjeje.
