Në Shqipëri ku shpeshherë suksesi nuk matet me idetë që sjell, por me personin që kopjon, një emër po ngjitet shpejt në skenën e biznesit të madh: Agim Xhindoli.
Po kush është ky biznesmen shqiptar, që ka vendosur t’i japë fund stresit të të qenit vetvetja.
Sepse pse të lodhesh duke shpikur një identitet tëndin kur ke një model kaq të suksesshëm përpara?
Ka blerë të njëjtat kostume të zeza të gjata që ngjajnë me një përzierje mes artisti avangardë dhe murg shpatullgjerë.
Ka lënë mjekrën “a la Rama”, që e përkëdhel me dorë sa herë bën ndonjë ofertë për tender.
Ka mësuar edhe ecjen, atë ecjen prej modeli që i thotë botës “unë nuk vij, unë rrëshqas mbi paratë publike”.
FOTO/ Kryetarja e Bashkisë së Lushnjes Eriselda Sefa bashkë me biznesmenin Agim Xhindoli
Z. Xhindoli, biznesmen i fushës së energjisë, ka zgjedhur një rrugë pak të pazakontë për të arritur majat – jo përmes inovacionit, por përmes imitimit.
Dhe jo çfarëdolloj imitimi.
Ai ka zgjedhur të kopjojë, në mënyrë të përpiktë, figurën e Edi Ramës.
Në fillim ishte veshja: kostume të zgjatura, me një stil që lë shije “bohem globalist” por në funksion të pushtetit vendor.
Biznesmeni Agim Xhindoli
Pastaj erdhi ecja – ajo ecje karakteristike, e ngadaltë dhe e vetëbesuar, që sikur thotë “nuk kam kohë për të ndalur, sepse po mendoj për fatin e kombit”.
Më pas, mjekra. Tani, edhe ajo është aty – ajo mjekër e shkurtër, gri, që shërben si një pasaportë estetike për të hyrë në qarqet ku merren vendime.
Dhe si për t’i vënë kapakun spektaklit të imitimit, edhe sjellja publike e Z. Xhindoli është e përpunuar me kujdes. Postimet në rrjetet sociale, madje edhe mënyra si rri para kamerave, e bëjnë të duket si një “Rama” i dytë – ndoshta jo me po aq retorikë, por sigurisht me të njëjtin synim: ndikim dhe kontrata.
Dhe ja ku vjen pikëpyetja thelbësore: A është kjo thjesht një lojë e pafajshme identiteti, apo një strategji e menduar për të fituar akses në një treg të mbyllur? Sepse nuk kalon pa u vënë re fakti që Z. Xhindoli ka filluar të fitojë tendera të mëdhenj, veçanërisht në fushën e fotovoltaikëve.
Në një vend ku figura publike shpesh bëhet çelësi i çdo dere, ndoshta Z. Xhindoli ka kuptuar diçka që të tjerët nuk e kanë kapur ende: nuk ka rëndësi kush je, mjafton të dukesh si ai që duhet.
Në fund të fundit, në një treg ku origjinaliteti shpesh ndëshkohet dhe klonimi shpërblehet, ndoshta Agim Xhindoli nuk është problemi. Ai është simptoma. Burimi Voxnews
