Kreu i forcave të armatosura të Britanisë së Madhe ka paralajmëruar se aktiviteti i nëndetëseve ruse po kërcënon kabllot nënujore që janë vendimtare për sistemet e komunikimit në mbarë botën. Mediat e huaja raportojnë se Admirali Sir Tony Radakin tha se kabllot nënujore që transmetojnë të dhëna të internetit janë “sistemi i vërtetë i informacionit në botë” dhe prerja e tyre do të ishte një akt lufte.
Sir Tony tha se kishte pasur një “rritje fenomenale në aktivitetin e nëndetëseve dhe nënujore ruse” në 20 vitet e fundit. Kjo do të thoshte se Moska mund të “vendosë në rrezik dhe potencialisht të shfrytëzojë sistemin e vërtetë të informacionit në botë.”
“Ky është vendi ku udhëton kryesisht i gjithë informacioni dhe trafiku i botës. Rusia ka rritur aftësinë për të vënë në rrezik ato kabllo nënujore dhe potencialisht për të shfrytëzuar ato kabllo nënujore.”-tha kreu i forcave të armatosura të Britanisë së Madhe.
Marina Mbretërore ka ndjekur aktivitetin e nëndetëseve ruse gjatë asaj periudhe.
