Këtë mëngjes Kryeministri Edi Rama nisi ditën me një postim në rrjete sociale i cili vinte në dukje çantën e re të gjigandit të modës Louis Vuitton. E veçanta e saj, përveç çmimit prej rreth 10,000 euro, janë motivet shqiptare si shqiponja dhe ngjyra e kuqe e përzier me logon LV. Sigurisht që një postim i tillë ngjalli komente patriotike, siç i do rasti, dhe shumë shpërndarje në Facebook, Instagram, Twitter, madje edhe nga shumë persona të cilët kanë një numër të madh ndjekësish.
Por çfarë e bën këtë postim shqetësues është fakti se çanta nuk është aspak “e re” siç thotë Kryeminsitri dhe të gjitha portalet që gjetën rastin të shkruajnë një artikull bazuar vetëm në 2 fjalitë e Z. Rama.
Në fakt, bëhet fjalë për një koleksion të Louis Vuitton i vitit 2018 (PO, 5 vite më parë). Çanta është realizuar nga LV në bashkëpunim me dizajnerin parizian Jay Ahr si pjesë e një koleksioni unik udhëtimi me motive nga shtete të ndryshme si Kazakistani, Argjentina, Japonia, Korea e Veriut etj. Sot, çanta nuk gjendet në koleksionin online të LV, jo sepse është bërë sold-out por sepse i përket një kolesioni të 5 viteve më parë.
A quhet ky një lajm i rremë apo një “click bait” për të gjeneruar disa klikime më shumë? Nëse është i tillë nga stafi i Z.Rama, a është detyra e mediave të kërkojnë për këtë “koleksion të ri” përpara se të shkruajnë për të?
