Autoriteti Portual i Durrësit ka njoftuar sot se lundrimi i planifikuar për ditën e sotme nga Durrësi në Ankona është anuluar. Shkak për këtë gjë është bërë një defekt që ka pësuar trageti “AF MARINA”. Në njoftimin zyrtar bëhet me dije se pasagjerët po njoftohen për ndryshimin e udhëtimit.
Ata gjithashtu kanë mundësinë të zgjedhin të shtyjnë biletën për një ditë tjetër apo të marrin mbrapsht 100% të vlerës së biletës. Një tjetër mundësi është ajo e udhëtimit drejt Barit në orën 01:00.
Njoftimi i Autoritetit Portual Durrës:
Njoftojmë të gjithë pasagjerët që kanë rezervuar lundrimin e tyre nga Porti i Durrësit drejt Ankonës (Itali) pasditen e sotme se ky lundrim NUK do të realizohet për shkak të një avarie që ka pësuar trageti “AF MARINA”(në Ankona). Riparimi i defektit është bërë i mundur mëngjesin e sotëm dhe për rrjedhojë nisja nga Ankona është bërë me disa orë vonesë.
Kompania “Adria Ferries” ka vendosur që nisja e ditës së sotme Durrës Ankona , ora 17.00 ,të anullohet dhe 483 pasagjerët me 146 autvetura të nisen për Bari me tragetin “AF Marina”.
Kompania “Adria Ferries” ka aktivizuar procedurën për asistencë ndaj pasagjerëve sipas normatives UE 1177.
Pasagjerët po njoftohen për ndryshimin e udhetimit, dhe mund të zgjedhin sipas dëshires:
– Të udhëtojnë sot drejt Barit ora 01.00 dhe në kohën e kryerjes së check-in, do t’u rimbursohet diferenca e tarifes që vjen si pasojë e ndryshimit të destinacionit,
– Biletat t’i shtyhet automatikisht për një ditë tjetër,
– Të marrin 100% të vlerës së biletes (nëse nuk udhëtojnë).
