Partia Demokratike dhe Partia Socialiste kanë nisur sot negociatat për të zgjedhur emrin e Presidentit të ri të vendit, pasi në korrik Ilir Meta largohet nga detyra e kreut të shtetit. Kreu i grupit parlamentar të PD, Enkelejd Alibeaj po zhvillon në ambientet e Kryesisë së Kuvendit një takim me kolegun, Taulant Balla.
Deri më tani nuk ka asnjë emër nga palët mbi të cilin do të diskutohet, të paktën publikisht, ndërsa nga radhët e PD-së ka pasur më shumë “trazira”. Duket se negociatat kanë nisur që sot edhe pse procedurat për zgjedhjen e kreut të ri të shtetit duhet të nisin brenda datës 24 maj.
Deri më tani, ish-kryeministri Sali Berisha ka deklaruar se ende nuk ka një emër për President, por hodhi poshtë mundësinë e një konsensusi me Ramën për zgjedhjen e kreut të ri të shtetit. I pyetur për emrin e Lulzim Bashës si kandidat, Berisha tha se ai është propozim i Ramës e nuk merret me to. Të njëjtin emër, deputetja Grida Duma ka deklaruar se nuk do ta votojë, Ndërsa Taulant Balla shprehet se kërkon një President ‘normal’, jashtë palëve politike.
