Kryeministri Edi Rama ka nisur prezantimin e programit elektoral të PS-së për mandatin e tretë, sipas tij. Veç premtimeve të përsëritura prej 23 vitesh në politikë, kryeministri ka folur dhe për papunësinë.
Dje, për të justifikuar mungesën e vendeve të punës, kreu i qeverisë fajësoi shqiptarët që sipas tij rrinë gjithë ditën kafeneve. Sipas kryeministrit, dembelizmi i shqiptarëve ka bërë që në Shqipëri të vijnë punëtorë nga vendet e tjera.
“Ka filluar ardhja e punëtorëve të huaj në një vend ku shumëkush ndër ata që thonë se duan punë, duke qëndruar në kafe, ka vende pune që po i marrin të huajt. Nuk është diçka që ndodh vetëm në Shqipëri, ndodh kudo, ka filluar të ndodhë dhe në Shqipëri do të jetë gjithmonë e më intensive, sidomos në shërbime” u shpreh Rama.
Deklarata e kreut të qeverisë duket si një justifikim për faktin se pas tetë viteve në pushtet ende nuk ka mbajtur premtimin e bërë mandatin e parë për 300 mijë vende pune.
Pra kryeministri i thotë shqiptarëve se vende pune ka plotë, por ju jeni dembelë që rrini kafeneve, dhe ne jemi të detyruar të marrim punëtorë nga vendet e tjera.
Në fakt, gjatë tetëve viteve të qeverisjes së Edi Ramës në Shqipëri ka një kategori punëtoresh të huaj që kanë ardhur në mënyrë gati masive. Janë shtetas nga vendet e Afrikës së Veriut, kinezë dhe turq që punojnë në kompani të huaja dhe së fundi janë marrë dhe nga kompani vendase.
