Kryeministri Edi Rama ka mbyllur fjalimin e tij në mbledhjen e kryesisë së Partia Socialiste e Shqipërisë me një mesazh për ish-ministren e Infrastrukturës dhe tashmë deputeten Belinda Balluku, e cila po përballet me hetimin e SPAK.
Pas një fjalimi që zgjati më shumë se një orë, Rama falënderoi Ballukun për drejtimin e Ministrisë së Infrastrukturës për gjashtë vite, duke theksuar se në përballjen e saj me drejtësinë do të ketë në krah vetëm avokatët.
“E falënderoj Belindën për punën e madhe që bëri në detyrat që i besova për 6 vjet me radhë dhe i uroj fatin që meriton, cilido qoftë ai, në betejën ligjore për të cilën do të ketë në krah vetëm avokatët e saj”, u shpreh Rama.
Kryeministri gjithashtu deklaroi se kërkesa e SPAK për arrestimin e Ballukut nuk është e justifikuar nga provat e paraqitura, duke shtuar se duhet të merret në konsideratë edhe fakti që ajo është prind i vetëm i një vajze të vogël.
Në fjalën e tij, Rama tregoi se Balluku kishte paraqitur tre herë dorëheqjen nga detyra, por ai i kishte refuzuar këto kërkesa. Kryeministri kërkoi ndjesë publikisht për këtë vendim, duke theksuar se refuzimi i dorëheqjeve ishte bërë për shkak të bindjes së tij se drejtësia kishte ndërhyrë në territorin e pushteteve të tjera.
“Pushteti këtu buron nga vota e popullit dhe kjo do të jetë e patolerueshme sa të jem unë në këtë detyrë”, u shpreh Rama.
Çështja ndaj Belinda Balluku ka hapur një debat të fortë politik në vend, ndërsa hetimet e SPAK pritet të vijojnë në ditët në vijim.
