Presidentja e Komisionit Evropian, Ursula von der Leyen ,u shpreh se në samitin e ditës së sotme BE-Ballkani Perëndimor të mbajtur në Bruksel, Kosovës dhe Serbisë u është kërkuar përmbushja e angazhimeve në kuadër të dialogut të lehtësuar nga Bashkimi Evropian.
Në konferencë për shtyp pas samitit, Von der Leyen ka thënë se të dyja vendet kanë bërë hapa të rëndësishëm këtë vit me marrëveshjen e Ohrit, e cila pritet të zbatohet nga të dyja palët.
“Si për Kosovën ashtu edhe për Serbinë, është rruga përpara dhe përmbushja e angazhimeve në kuadër të dialogut të BE-së. Ata kanë bërë hapa të rëndësishëm përpara këtë vit me marrëveshjen e Ohrit, e cila tani duhet të zbatohet dhe e mirëpres shumë uljen e tensioneve në veri të Kosovës në veçanti për rrymën dhe përgatitjen për zgjedhje të parakohshme komunale”, ka thënë ajo.
Ajo ka folur edhe për vendet e rajonit dhe zgjerimin e BE-së, duke thënë se duan të hapin negociatat sa më shpejtë me Shqipërinë dhe Maqedoninë e Veriut, ndërsa me Bosnje e Hercegovinën do t’i hapin negociatat pasi të plotësohen kriteret e anëtarësimit.
“Kur bëhet fjalë për Malin e Zi është një moment i ri për vendin me qeverinë e re për t’u rikthyer në rrugën drejt kërkimit për anëtarësim”, u shpreh Der Leyen.
Në lidhje me samitin ka folur dhe presidenti i Këshillit Evropian, Charles Michel ku është shprehur se duan të shtrijnë bashkëpunimin me të gjitha vendet e Ballkanit Perëndimor.
Më tej ai ka shtuar se është prezantuar plani i zgjerimit i propozuar nga Komisioni Evropian, i cili sjell vendet e Ballkanit Perëndimor më afër Bashkimit Evropian.
“Ne duam të bashkëpunojmë në luftën kundër dezinformimit dhe për fushën e migrimit. Në këtë samit ne kemi theksuar përshpejtimin e afrimit të Ballkanit Perëndimor me Bashkimin Evropian”, tha ai.
