IRANË- Djali i dëbuar në mërgim i Shahut të fundit të Iranit u vetëofrua sot si udhëheqës i përkohshëm për të marrë drejtimin e vendit. Reza Pahlavi, të cilët mbështetësit e quajnë “Princi i Kurorës së Iranit”, i bëri thirrje bashkësisë ndërkombëtare që të rrëzojë regjimin teokratik të Ayatollah Ali Khameneit.
Ai tha se po krijonte një platformë të re të sigurt për disidentët dhe kundërshtarët e brendshëm të regjimit për të koordinuar përpjekjet e tyre për të përmbysur diktaturën dhe për ta vendosur vendin në rrugën e një të ardhmeje të lirë dhe demokratike.
“Ne jemi një popull krenar, i lashtë dhe rezistent. Për bashkatdhetarët e mi. Ky është momenti ynë. Unë jam me ju. Le ta ndërtojmë së bashku këtë Iran të ri. Jam këtu sot për tu nënshtruar bashkatdhetarëve të mi dhe për t’i udhëhequr ata në këtë rrugë paqeje,” tha Pahlavi në një konferencë për shtyp në Paris të hënën.
Gjatë konferencës për shtyp Princi i Kurorës Reza Pahlavi dënoi Republikën Islamike për shtypjen e vazhdueshme të popullit iranian. Ai e paralajmëroi bashkësinë ndërkombëtare kundër ofrimit të një litari shpëtimi për Republikën Islamike dhe theksoi se vetëm një Iran demokratik do ta ndalonte rritjen e programit bërthamor.
Pahlavi ofroi tre parime themelore: Integritetin territorial, Liritë individuale dhe barazinë e të gjithë qytetarëve, dhe Ndarjen e fesë nga shteti.
Ai iu drejtua drejtpërdrejt Udhëheqësit SupremAjatollah Ali Khamenei, duke i thënë: “Dorëhiquni. Dhe nëse e bëni këtë, do të keni një gjykim të drejtë dhe një proces të rregullt ligjor. Gjë që është më shumë sesa i keni dhënë ndonjëherë ndonjë iraniani.”
Ai u tha zyrtarëve të regjimit se edhe ata do të përballeshin me drejtësinë, por se nuk do të përsërisnin gabimet e tranzicioneve të tjera të dështuara.
“Ky është momenti ynë i Murit të Berlinit”, tha ai ndërsa kujtoi luftën e dhimbshme për liri politike.
