Procesi i anëtarësimit të Shqipërisë në Bashkimin Europian po ecën përpara normalisht, pa asnjë bllokim apo veto nga vendet anëtare, ndërkohë që është konfirmuar një plan ambicioz që parashikon anëtarësimin e plotë të vendit brenda horizontit kohor të vitit 2030.
Këto ishin mesazhet kryesore të dala nga një raportim i detajuar mbi ecurinë e negociatave nga ana e ministrit të Jashtëm Ferit Hoxha në Komisionin Parlamentar për Punët e Jashtme.
Në kundërshtim me zërat në debatin publik për një ngërç të mundshëm, Hoxha theksoi se pretendimet për bllokime apo veto nga shtete specifike nuk qëndrojnë.
“Nuk ka pasur dhe nuk ka bllokim, nuk ka pasur dhe nuk ka veto nga asnjë shtet anëtar për procesin e anëtarësimit të Shqipërisë në BE”, u deklarua qartë nga Hoxha, duke shtuar se kjo ecuri pozitive është konfirmuar edhe nga Delegacioni i BE-së në Tiranë.
Procesi aktualisht është i përqendruar në nivelin teknik në Bruksel, ku Grupi i Punës për Zgjerimin i Këshillit (COELA) ka shqyrtuar gjatë muajve mars dhe prill raportin vlerësues për Shqipërinë (IBAR).
Ndonëse Shqipëria nuk merr pjesë drejtpërdrejt në këto diskutime të brendshme mes Komisionit dhe Këshillit, Hoxha bëri të ditur se rekomandimet e Komisionit Europian kanë qenë pozitive, duke njohur progresin e arritur nga vendi.
Udhërrëfyesi për vitet e ardhshme është tashmë i qartë. Plani parashikon mbylljen e negociatave teknike deri në fund të vitit 2027, për të mundësuar nënshkrimin e Traktatit të Anëtarësimit gjatë vitit 2028.
Finalizimi i këtyre hapave do t’i hapte rrugë anëtarësimit të plotë të Shqipërisë në Bashkimin Europian brenda vitit 2030.
Për arritjen e këtij objektivi, tha Hoxha, po vijon një angazhim i gjerë diplomatik. Kontaktet në nivel të lartë me zyrtarë në Bruksel dhe në kryeqytetet europiane janë intensifikuar.
Si një shembull konkret i kësaj mbështetjeje u përmend vizita e fundit në Tiranë e ministrave të Jashtëm të Austrisë, Çekisë dhe Sllovakisë, të cilët konfirmuan mbështetjen e palëkundur për rrugëtimin europian të Shqipërisë.
Ecuria e procesit shihet me optimizëm edhe në dritën e kontekstit të ri gjeopolitik, ku zgjerimi nuk konsiderohet më një proces teknik, por një investim strategjik për stabilitetin dhe sigurinë e gjithë kontinentit.
Në këtë kuadër, ministri Hoxha theksoi se Shqipëria vlerësohet si një vend që kontribuon aktivisht për sigurinë europiane dhe që meriton vendin e saj në familjen europiane.
Për këtë, theksi mbetet te vijimi me vendosmëri i reformave të brendshme, si mënyra më e mirë për të dëshmuar progres të qëndrueshëm dhe të verifikueshëm.
