Maliq- Dalin në dritë detaje të reja nga vrasja mizore e të riut në Maliq.
Martin Çeço u gjet i vdekur në ujërat e rezervuarit në fshatin Kolanec.
Sipas dyshimeve paraprake të policisë, ai ishte vrarë përpara se të hidhej në liqen. Për ngjarjen policia ka ndaluar 3 autorët e dyshuar.
Shkak dyshohet se është bërë një vajzë, me të cilën Çeço kishte nisur një njohje përmes komunikimit në rrjetet sociale.
Dyshohet se vajza për të cilën është vrarë 26 vjeçari ka qënë në lidhje paralele me një nga autorët.
Nga ana tjetër autorët e kanë inskenuar vrasjen që të duket si vetëvrasje, pasi kanë lënë buzë rezervuarit shapkat e 26 vjeçarit si dhe ka pasur shenja litari në fyt.
Policia ka arrestuar si të dyshuar për vrasjen Bleti Angjo, Valter Mollaj dhe Edlir Mollaj, të cilët e kishin mbytur duke i shkaktuar plagë në fyt 26 vjeçarin, dhe më pas kishin hedhur trupin e tij në liqen.
Burime tregojnë se vajza në fjalë ishin në fillimet e njohjes së tyre, por edhe të afërmit e të resë nuk kanë qenë dakord me këtë lidhje, pasi sipas tyre viktima nuk kishte as arsim 9-vjeçar.
Banorë të fshatit thanë se i riu nuk ishte larguar kurrë ngë vendi, dhe se merrej kryesisht me prerjen e druve në pyll, duke ndihmuar familjen e tij.
Zhdukja e të riut u denoncua nga babai i tij.
Grupi hetimor po vazhdon punën për zbardhjen e rrethanave të plota të ngjarjes.
Njoftimi i policisë:
Finalizohet operacioni policor i koduar “Marjani”.
Operacioni, pas hetimeve intensive nga Sektori për Hetimin e Krimeve, në bashkëpunim me Komisariatin e Policisë Maliq, nën drejtimin e Prokurorisë Korçë.
Zbardhet dhe dokumentohet ngjarja e ndodhur dy ditë më parë, në rezervuarin e fshatit Kolanec, Maliq, ku u gjet i pajetë shtetasi M. Ç.
Vihen në pranga 3 autorët e dyshuar të vrasjes së 26-vjeçarit.
Në vijim të punës për zbardhjen dhe dokumentimin e plotë me prova ligjore të ngjarjes së ndodhur dy ditë më parë, në rezervuarin e fshatit Kolanec, Maliq, ku u gjet i pajetë shtetasi M. Ç., 26 vjeç, banues në këtë fshat, i cili rezultonte i larguar nga banesa, specialistët e Sektorit për Hetimin e Krimeve në Drejtorinë Vendore të Policisë Korçë, në bashkëpunim me Komisariatin e Policisë Maliq, nën drejtimin e Prokurorisë pranë Gjykatës së Rrethit Gjyqësor Korçë, finalizuan me sukses operacionin e koduar “Marjani”. Si rezultat i këtij operacioni u bë ndalimi i tre autorëve të dyshuar të kësaj ngjarjeje, shtetasve:
– B. A., 38 vjeç, banues në fshatin Peshkëpi, Pogradec (i dënuar më parë për vjedhje);
– V. M., 43 vjeç, banues në fshatin Marjan, Korçë;
– E. M., 35 vjeç, banues në fshatin Marjan, Korçë.
Shërbimet e Policisë, pasi kanë nxjerrë nga rezervuari trupin e pajetë të 26-vjeçarit M. Ç., kanë krijuar dyshime se bëhej fjalë për një ngjarje kriminale, duke qenë se gjatë këqyrjes, në trupin e 26-vjeçarit, janë konstatuar shenja në pjesën e fytit.
Falë punës profesionale hetimore, provave dhe informacioneve të grumbulluara nga grupi hetimor, u dokumentua se tre shtetasit e arrestuar, në bashkëpunim me njëri-tjetrin, më datë 12.06.2022, kanë marrë viktimën M. Ç., në fshatin Kolanec, dhe pasi e kanë vrarë (mbytur), për motive të dobëta, kanë hedhur trupin e tij në rezervuar, për të mbuluar ngjarjen dhe për të inskenuar një vetëvrasje të 26-vjeçarit.
Materialet i kaluan Prokurorisë pranë Gjykatës së Shkallës së Parë Korçë, për veprën penale “Vrasja me paramendim”, kryer në bashkëpunim.
