Një 27-vjeçar është arrestuar në Tiranë në kuadër të megaoperacionit policor të koduar “Tempulli 2”. R.H., banues në Tiranë shpërndante lëndë narkotike në doza në afërsi të fushës sportive në Laprakë, e cila frekuentohet nga nxënës shkolle.
Shërbimet e Komisariatit nr.3 në kryeqytet siguruan informacionin për këtë shtetas që shpërndante kanabis në Laprakë dhe organizuan punën për kapjen e tij.
Ai u arrestua në flagrancë në rrugën “Mati Logoreci” dhe gjatë kontrollit iu gjetën 63 doza me kanabis të cilat i kishte fshehur në sahatin e ujit, në një pallat afër fushës së Laprakës.
Ndërkaq po punohet për identifikimin e personave të tjerë të implikuar në këtë veprimtari kriminale.
Njoftimi i Policisë:
Tiranë/Vijon megaoperacioni policor i koduar “Tempulli 2”.
Goditet nga Komisariati i Policisë Nr. 3, në bashkëpunim me Seksionin për Hetimin e Narkotikëve, një rast i shitjes së lëndëve narkotike, në doza, afër një fushe sportive, që frekuentohet nga nxënës shkolle.
Sekuestrohen 63 doza lënde narkotike kanabis, gati për shitje, vihet në pranga poseduesi.
Shërbimet e Komisariatit të Policisë Nr. 3, në bashkëpunim me Seksionin për Hetimin e Narkotikëve, në vijim të veprimeve intensive operacionale të kryera në kuadër të megaoperacionit policor mbarëkombëtar, antidrogë, të koduar “Tempulli 2”, pasi kanë siguruar informacion se një shtetas shiste lëndë narkotike kanabis, kanë organizuar punën për kapjen dhe vënien e tij përpara përgjegjësisë penale.
Si rezultat, në rrugën “Mati Logoreci”, u kap dhe arrestua në flagrancë shtetasi R. H., 27 vjeç, banues në Tiranë.
Nga verifikimet e kryera ka rezultuar se ky shtetas e siguronte lëndën narkotike në sasi dhe më pas e ndante në doza, të cilat i shiste në afërsi të fushës sprotive, në Laprakë, e cila frekuentohet nga nxënës shkolle.
Në cilësinë e provës materiale u sekuestruan 63 doza me kanabis, të cilat 27-vjeçari i kishte fshehur në sahatin e ujit, në një pallat afër fushës së Laprakës.
Punohet për identifikimin e personave të tjerë, të implikuar në këtë veprimtari kriminale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
